Fasteignamarkaðurinn tekur við sér að nýju

Sumardeyfðinni á fasteignamarkaðinum á höfuðborgarsvæðinu virðist vera lokið í bili en í síðustu viku var 109 kaupsamningum um fasteignir þinglýst í borginni. Þetta er nokkuð yfir meðaltalinu síðustu þrjá mánuði sem er 103 samningar á viku.

Þetta kemur fram á vefsíðu Þjóðskrár Íslands. Þar segir að heildarveltan í síðustu viku hafi verið tæplega 3,2 milljarðar króna sem er hátt í 200 milljónum kr. meiri velta en nemur vikumeðaltalinu síðustu þrjá mánuði.

Meðalverð á fasteign í vikunni var rúmlega 29 milljónir króna sem er svipað og vikumeðaltalið síðustu þrjá mánuði.