Krefst fundar með FME vegna Straums fjárfestingabanka

Lilja Mósesdóttir, þingmaður utan flokka, hefur krafist fundar í efnahags- og viðskiptanefnd Alþingis vegna greinar Þórðar Snæs Júlíussonar í Fréttablaðinu um helgina. Í greininni kemur meðal annars fram að eigandi Straums sé Davidsson-Kempner vogunarsjóðurinn.

Lilja segir í bréfi til formanns efnahags- og viðskiptanefndar að í umræðum um hæfi eigenda þegar viðskiptanefnd vann að umfangsmiklum breytingum á lögum um fjármálafyrirtæki vorið 2010 hafi það verið sinn skilningur sem formaður að vogunarsjóðir væru ekki hæfir eigendur fjármálafyrirtækja.

„Ég óska því eftir að fá fulltrúa FME á fund efnahags- og viðskiptanefndar til að útskýra forsendur þess að eftirlitið samþykkti ALMC sem hæfan eiganda fjármálafyrirtækis," segir Lilja.

Í grein í Markaðnum í dag kemur svo fram að Fjármálaeftirlitið telur sig ekki geta upplýst hverjir séu virkir eigendur Straums á grundvelli þagnarskyldu. Fyrirtækið gekk í gegnum nauðasamninga fyrir um tveimur árum.