Aukin jákvæðni meðal stjórnenda fyrirtækja

Margfalt fleiri stjórnendur telja aðstæður slæmar í atvinnulífinu en að þær séu góðar en fleiri þeirra eru á jákvæðu nótunum en í síðustu könnun sem gerð var í júní s.l.. Nú telja 48,1% þeirra aðstæður vera slæmar, 6,4% að þær séu góðar en 45,5% að þær séu hvorki góðar né slæmar.

Þetta kemur fram í hefðbundinni könnun Samtaka atvinnulífsins en greint er frá henni á vefsíðu samtakanna. Meginbreytingin frá síðustu könnun er sú að þeim sem þykja aðstæður góðar eru rúmlega tvöfalt fleiri en í júní og að þeim sem finnast aðstæður slæmar hefur fækkað úr 63,2% og niður í 48,1%.

Á vefsíðunni segir að mikill munur er á milli landsbyggðar og höfuðborgarsvæðis þar sem 65% stjórnenda á landsbyggðinni telja aðstæður slæmar en 42% á höfuðborgarsvæðinu. 70% stjórnenda í byggingariðnaði og 65% stjórnenda í sjávarútvegi telja aðstæður slæmar. Skásta matið á núverandi aðstæðum er að finna í ýmissi sérhæfðri þjónustu. Hlutfallslega fleiri stjórnendur í stórum fyrirtækjum en þeim minni telja aðstæður slæmar

Mat á aðstæðum eftir sex mánuði er svipað og í síðustu könnun. Tveir af hverjum þremur stjórnendum telja að þær verði óbreyttar, en heldur fleiri að þær versni en að þær batni.

Stjórnendur í sjávarútvegi skera sig úr þar sem rúmlega 60% telja að aðstæður versni en 40% að þær verði óbreyttar. Stjórnendur á landsbyggðinni eru mun svartsýnni á þróun næstu mánaða en á höfuðborgarsvæðinu. Stjórnendur stærri fyrirtækja eru heldur svartsýnni en stjórnendur þeirra smærri.