Töluverður samdráttur í dagvöruverslun milli ára

Velta í dagvöruverslun dróst saman um 5,6% á föstu verðlagi í mars miðað við sama mánuð í fyrra og um 4,6% á breytilegu verðlagi. Leiðrétt fyrir árstíðabundnum þáttum jókst velta dagvöruverslana í mars um 1,2% frá sama mánuði í fyrra. Verð á dagvöru hækkaði um 1,1% á síðastliðnum 12 mánuðum.

Þetta kemur fram í yfirliti frá Rannsóknarstofu verslunarinnar. Sala áfengis dróst saman í mars miðað við sama mánuð í fyrra en að mestu leiti má rekja samdráttinn til þess að í fyrra fluttist verslun fyrir páska að hluta yfir í mars mánuð því páskar voru þá snemma í apríl. Skýrir það að mestu samdrátt milli ára um 20,0% á breytilegu verðlagi og 20,9% á föstu verðlagi. Leiðrétt fyrir árstíðabundnum þáttum nam samdráttur í veltu áfengis í mars 2,7% frá sama mánuði í fyrra. Verð á áfengi var 1,1% hærra í mars síðastliðnum en í sama mánuði í fyrra.

Fataverslun var 13,9% minni í mars miðað við sama mánuð í fyrra á föstu verðlagi og minnkaði um 14,8% á breytilegu verðlagi á sama tímabili. Leiðrétt fyrir árstíðabundnum þáttum dróst velta fataverslunar í mars saman um 12,6% frá sama mánuði árið áður. Verð á fötum lækkaði um 1,1% í mars síðastliðnum frá sama mánuði ári fyrr.

Velta skóverslunar lækkaði um 8,2% í mars á föstu verðlagi og um 14,9% á breytilegu verðlagi miðað við sama mánuð í fyrra. Verð á skóm lækkaði um 7,3% frá mars í fyrra.

Velta húsgagnaverslana dróst saman um 9,4% í mars frá sama mánuði í fyrra á föstu verðlagi og um 8,3% á breytilegu verðlagi. Verð á húsgögnum var 1,2% hærra í mars síðastliðnum miðað við sama mánuð í fyrra. Velta sérverslana með rúm dróst saman í mars um 30,6% frá sama mánuði í fyrra á föstu verðlagi. Velta í sölu skrifstofuhúsgagna var 19,9% meiri í mars síðastliðnum samanborið við sama mánuð í fyrra á föstu verðlagi.

Sala á raftækjum í mars jókst um 18,0% árstíðaleiðrétt á föstu verðlagi sé miðað við sama mánuð síðasta árs. Verð á raftækjum lækkaði um 10,8% frá mars 2010 og skýrir það að hluta til lægri nafnveltu.