IFS greining spáir 0,75 prósentustiga vaxtalækkun

IFS greining segir að öll rök séu fyrir 75 punkta lækkun stýrivaxta (veðlánavaxta) í febrúar sem stæðu þá í 3,75%. Stýrivaxtafundur Seðlabanka Íslands verður haldinn næsta miðvikudag, 2. Febrúar.

Í spá IFS segir að vaxtaákvörðunin velti þó mikið á áætlun um afnám gjaldeyrishaftanna en til stendur að birta áætlun um afnám þeirra í lok febrúar eða byrjun mars.

„Einnig gerum við ráð fyrir að Seðlabankinn þrengi ekki vaxtaganginn (sjá mynd) frekar í þetta skiptið líkt og hann gerði við síðustu ákvörðun. Gangi spáin eftir og Seðlabankinn breyti vöxtum jafnt verða vextir á viðskiptareikningum lánastofnanna 2,75% og hámarksvextir á 28 daga innstæðubréfum 3,50%," segir IFS.

„Við gerum ráð fyrir því að afnám gjaldeyrishafta verði framkvæmt í smáum skrefum þegar hættan á óstöðugleika og útflæði gjaldeyris hefur verið lágmörkuð. Verði sú raunin er að okkar mati ekki ástæða til að halda vöxtum háum og gætu þeir verið lækkaðir meira og á svipuðum hraða og verið hefur. Ákveði Seðlabankinn hins vegar að ráðast hratt í afnám hafta teljum við nauðsynlegt að hækka vexti til að styðja við gengið."

Þá kemur fram að 0nnur rök fyrir stýrivaxtalækkun í næstu viku eru hversu hratt verðbólgan hefur hjaðnað. Hún hefur hjaðnað hraðar en flestir bjuggust við og er 12 mánaða verðbólga komin niður í 1,8% í janúar. Fjárfestingar eru í lágmarki og framleiðsluslaki er mikill, atvinnuleysi fer hækkandi og verðbólga er á hraðri niðurleið.

Einnig kæmi vaxtalækkun sér vel fyrir skuldsett heimili og fyrirtæki. Raunstýrivextir á Íslandi eru jákvæðir (+2,7%) en hafa verið neikvæðir í BNA (-1,25%) frá seinni hluta 2009 og á evrusvæðinu (-1,2%) frá ársbyrjun 2010. Að mati IFS eru raunstýrivextir á Íslandi enn of háir.

„Lækkun gengis krónunnar frá síðustu vaxtaákvörðun er ekki líkleg til að hafa áhrif á ákvörðun vaxta nú að okkar mati. Lækkun undanfarna tvo mánuði er hægt að rekja til útflæðis vaxtagreiðslna, gjaldeyriskaupa S.Í. og árstíðarbreytinga í ferðamannaiðnaðinum. Þess vegna teljum við líklegt að lækkun gengis gangi fljótlega til baka," segir IFS greining.