Umfjöllun: Magnús endurnýjaði skotleyfið gegn Stjörnunni

Keflavík hafði betur gegn Stjörnunni, 92-102, í 14. umferð Iceland Express deild karla í kvöld. Jafnræði var með liðunum framan af leik en í þriðja fjórðungi sigu Suðurnesjamenn framúr og höfðu að lokum góðan tíu stiga sigur.

Jafnræði var með liðunum á upphafsmínútum fyrsta fjórðungs en í stöðunni 12-14 fyrir Keflavík tóku heimamenn við sér og skoruðu 14 stig í röð og náðu góðri forystu eftir fyrsta leikhluta 26-17.

Jovan Zdravevski hóf leikinn af miklum krafti og lét áfram til sín taka í öðrum fjórðungi. Hann fór fyrir liði heimamanna og skoraði meira en helming stiga liðsins í fyrri hálfleik eða alls 21. Annar fjórðungur var frábær skemmtun enda voru liðin óhrædd við að skjóta fyrir utan þriggja stiga línuna.

Keflvíkingar léku góðan varnarleik og náðu að halda sóknarleik Stjörnumanna í skefjum og um leið fóru skotin fyrir utan þriggja stiga línuna rata niður. Staðan í hálfleik 41-42 fyrir Keflvíkinga.

Hörður Axel Vilhjálmsson í liði Keflavíkur hóf þriðja leikhluta af miklum krafti. Hann skoraði fyrstu stig fjórðungsins með góðri troðslu og bætti við tveimur þristum áður en Stjörnumenn komust á blað.

Keflvíkingar létu kné fylgja kviði og segja má að Magnús Gunnarsson hafi fengið byssuleyfið endurnýja, slík var skotnýting hans fyrir utan þriggja stiga línuna. Keflvíkingar skoruðu 29 stig gegn 18 stigum Stjörnunnar og höfðu þrettán stiga forystu þegar lokafjórðungurinn hófst, 61-74.

Keflvíkingar héldu áfram að stríða Stjörnumönnum í lokafjórðungnum. Þeir teygðu vel á vörn Stjörnumanna og settu hvað eftir annað skot fyrir utan þriggja stiga línuna úr opnum færum.

Teitur Örlygsson, þjálfari Stjörnunnar, var allt annað en sáttur með varnarleik sinna manna enda hleyptu þeir gestunum hvað eftir annað í auðveld og opin færi. Stjörnumenn náðu að vinna sig inn í leikinn þegar skammt var eftir og minnkuðu muninn niður í fimm stig þegar tæp mínúta var eftir af leiknum.

Magnús Gunnarsson kom þá svellkaldur af bekknum og skellti niður þrist sem tryggði Keflvíkingum tvo punkta í baráttunni um deildarmeistaratitilinn. Justin Shouse var vísað úr húsi undir lok leiks fyrir að fella Hörð Axel sem hafði stolið boltanum og á leið í sókn.

Nýi erlendi leikmaðurinn hjá Keflavík, Thomas Sanders, var atkvæðamestur í liði Keflavíkur með 32 stig og lítur mjög vel út. Hann virðist smellpassa inn í leikstíl Keflavíkur og ljóst er að koma hans og Magnúsar styrkir liðið töluvert.

Magnús var frábær í liði Keflavíkur í kvöld og það sama má segja um Hörð Axel Vilhjálmsson sem skoraði 16 stig. Keflavík er nú með 20 stig í þriðja sæti deildarinnar. Frammistaða Stjörnunnar var ekki sannfærandi en þeir verma 5. sæti deildarinnar með 14 stig.

Stjarnan - Keflavík 92-102 (26-17, 15-25, 18-29, 31-28)

Stigaskor Stjörnunnar: Jovan Zdravevski 24, Renato Lindmets 23/9 fráköst, Justin Shouse 22/12 stoðsendingar, Kjartan Atli Kjartansson 9, Fannar Freyr Helgason 8, Marvin Valdimarsson 5, Daníel G. Guðmundsson 1.



Stigskor Keflavíkur: Thomas Sanders 32, Magnús Þór Gunnarsson 26, Hörður Axel Vilhjálmsson 16/9 fráköst, Sigurður Gunnar Þorsteinsson 9, Þröstur Leó Jóhannsson 8, Gunnar Einarsson 3, Halldór Örn Halldórsson 3, Gunnar H. Stefánsson 3, Jón Nordal Hafsteinsson 2.











Magnús: Áttum að drepa leikinn fyrr

„Ég er alltaf með byssuleyfi," sagði Magnús Gunnarsson, stórskytta úr Keflavík, kátur eftir sigur sinna manna gegn Stjörnunni í Iceland Express deild karla í kvöld, 92-102.

Magnús setti niður 26 stig í leiknum í kvöld og styrkir lið Keflavíkur töluvert ásamt nýja erlenda leikmanni liðsins, Thomas Sanders, sem skoraði 32 stig í kvöld.

„Ég var að leika mjög vel en við áttum að drepa þennan leik miklu fyrr. Við unnum með tíu stigum og ég hefði tekið þau úrslit fyrir leikinn," sagði Magnús sem er mjög hrifinn af nýja erlenda leikmanni liðsins, áðurnefndum Sanders.

„Þetta er hörkukani, duglegur, óeigingjarn og spilar góða vörn. Þegar það koma tveir nýir góðir menn inn í liðið þá eykst flæðið í leiknum hjá okkur. Keflavík er í hörkugír og ætlum okkur að enda eins ofarlega og við getum í deildinni."

Teitur: Nokkrir leikmenn voru ekki klárir í leikinn

Teitur Örlygsson, þjálfari Stjörnunnar, var skiljanlega ósáttur eftir tap sinna manna gegn Keflavík í kvöld, 92-102 í Ásgarði. Stjörnumenn byrjuðu leikinn betur en Keflvíkingar komust betur inn í leikinn og sigu frammúr í síðari hálfleik.

„Við vorum með leikinn í höndunum en hleyptum þeim alltof auðveldlega inn í leikinn. Keflavík fær sjálfstraust í kjölfarið og við fórum að gera allt annað en lagt var upp með," segir Teitur sem var ekki ánægður með frammistöðu nokkurra leikmanna í sínu liði.

„Justin Shouse hefur verið frábær í undanförnum leikjum og lítur mun betur út en hann gerði fyrir áramót. Það voru nokkrir leikmenn sem voru ekki klárir í leikinn og ég er afar óhress með það."

Teitur er ekkert sérstaklega upptekinn af stöðu liðsins í deildinni heldur ætlar að undirbúa liðið af kostgæfni fyrir úrslitakeppnina. Stjarnan situr nú í 5. sæti með 14 stig. „Við stöðuna í deildinni ekki fara í taugarnar á okkur. Núna ætlum við að nota hvern leik til að verða aðeins betri og vonandi að toppa á réttum tíma."