Triton bíður lokasvara um IG

Evrópska fjárfestingarfélagið Triton telur verksmiðjustarfsemi Icelandic Group (IG) vera fyrirtaks fjárfestingarkost til lengri tíma og er því tilbúið að greiða fyrir það hátt verð.

Þetta segir Carl-Evald Bakke-Jacobsen í samtali við Fréttablaðið, en hann er meðeigandi að Triton og fer fyrir félaginu í samningaviðræðum við Framtakssjóð Íslands um kaupin.

Um er að ræða verksmiðjur í Evrópu, Asíu og Ameríku, en sölukerfið og vörumerkið IG verða áfram í eigu Íslendinga. Áætlað hefur verið að Framtakssjóðurinn hafi greitt um 40 milljarða fyrir IG. Þegar hefur borist 52 milljarða boð í fyrirtækið en samkvæmt því sem fram hefur komið í Fréttablaðinu er tilboð Triton hærra.

„Takmark okkar er ekki bara að kaupa framleiðsluhluta IG heldur að koma upp sjávarútvegsfyrirtæki á heimsvísu."

Bakke-Jacobsen segir undirbúningi lokið af hálfu Triton og beðið sé ákvörðunar Framtakssjóðsins. „Ég tel afar mikilvægt að málið verði leitt til lykta fljótlega."

Stjórn Framtakssjóðsins fundar í dag og gætu málin skýrst í framhaldinu.- þj