Karl Georg skili tíu milljónum

Dómsmál Lögmanninum Karli Georg Sigurbjörnssyni hefur verið gert að endurgreiða þrotabúi Baugs Group 9,9 milljónir króna sem hann fékk greiddar sem eins konar skaðabætur um áramótin 2008 og 2009. Héraðsdómur Reykjavíkur féllst í gær á þá kröfu skiptastjóra Baugs að greiðslunum skyldi rift.

Karl Georg tók að sér að hafa milligöngu um kaup á stofnfjárbréfum í Sparisjóði Hafnarfjarðar fyrir A-Holding, dótturfélag Baugs. Þau viðskipti leiddu til þess að hann var ákærður fyrir fjársvik, en síðar sýknaður. Fyrir það ómak að lenda í dómsmáli ákváðu forsvarsmenn Baugs að greiða honum milljónir í bætur, sem héraðsdómur hefur nú úrskurðað að sé óeðlilegur gjafagerningur.- sh