Vilja kaupa Haga

Fjárfestarnir Árni Hauksson og Friðrik Hallbjörn Karlsson fara fyrir hópi þeirra fjárfesta sem hyggjast kaupa þriðjungshlut í Högum. Sjóður í rekstri Stefnis, verðbréfasjóðs Arion banka kemur líka að kaupunum. Samningaviðræður um kaupin standa nú yfir.

Hagar eru langstærsta verslunarfyrirtæki landsins og reka meðal annars Hagkaup og Bónus. Samningaviðræður um kaupin standa nú yfir, en engin endanleg ákvörðun hefur verið tekin. Samkvæmt heimildum fréttastofu yrðu helstu aðilar að kaupunum þeir Árni Hauksson og Friðrik Hallbjörn Karlsson auk lífeyrissjóða. Hópurinn hyggst kaupa um 34% hlut í Högum.

Sjóður í rekstri Stefnis, dótturfélags Arion banka sem rekur verðbréfasjóði, fjárfestingarsjóði og fagfjárfestasjóði, kemur líka að kaupunum. Sjóðurinn er hins vegar ekki í eigu Stefnis og því ekki hægt að halda því fram að Arion banki sé að selja dótturfyrirtæki sínu Haga, eins og haldið hefur verið fram í fjölmiðlum í dag.

Fram kemur í Morgunblaðinu í dag að Arion Banki hafi hafnað 20 milljarða tilboði í 95% hlutafé Haga, talið er að það tilboð sé frá erlendum fjárfestum. Bankinn segir að stefnt hafi verið að sölu 15-29% kjölfjárfestuhlutar, en öll tilboð hafi þó verið tekin til greina.

Þá greindi fréttastofa jafnframt frá því í hádeginu í dag að Framtakssjóður Íslands hafi ásamt innlendum og erlendum fjárfestum boðið í um 60-90% hlut. Sjálfur ætlaði sjóðurinn að eiga um 25%. Ólíklegt er þó að að því tilboði verði gengið.

Þeir Árni Hauksson og Friðrik Hallbjörn Karlsson hafa verið viðskiptafélagar um árabil. Þeir keyptu Húsasmiðjuna af börnum Snorra Halldórssonar á rúma 3,7 milljarða króna árið 2002, en seldu það Baugi tæpum þremur árum seinna.