Eignir sjóða minnka um 571 milljón

Eignir verðbréfa- og fjárfestingarsjóða námu 288,4 milljörðum kr. í lok desember og lækkuðu um 571 milljónir kr. milli mánaða.

Þetta kemur fram í hagtölum Seðlabankans. Þar segir að sjóður og bankainnstæður lækkuðu um 3,4 milljarða kr. og ríkisbréf lækkuðu um 1,1 milljarð kr. Fjárfestingar í innlánum hækkuðu um 4,3 milljarða kr.

Innlend verðbréf nema 94,6% af heildareignum.

Í lok desember var opið fyrir viðskipti með hlutdeildarskírteini í 55 sjóðum. Auk þess voru 15 sjóðir í slitaferli taldir með í birtum gögnum í nóvember, þar sem verið er að gera upp eignir sjóðanna áður en þeim verður lokað.