Allt útlit fyrir að gjaldþrotamet hafi verið slegið í fyrra

Allt útlit er nú fyrir að nýtt met verði slegið á árinu 2010 hvað varðar fjölda gjaldþrota og að fyrra met frá árinu 2009 verði slegið út. Það ár voru 910 fyrirtæki úrskurðuð gjaldþrota sem var það mesta sem sést hefur undanfarna áratugi.

Þetta kemur fram í Morgunkorni greiningar Íslandsbanka. Alls voru 101 fyrirtæki tekin til gjaldþrotaskipta í nóvember síðastliðnum samanborið við 80 fyrirtæki á sama tíma í fyrra. Gjaldþrot jukust því um 26% í nóvember frá fyrra ári.

Fyrstu 11 mánuði síðasta árs voru 877 fyrirtæki úrskurðuð gjaldþrota. Á sama tímabili árið 2009 höfðu 829 fyrirtæki hlotið þau örlög. Þetta jafngildir aukningu um 5,8% milli ára. Hagstofa Íslands birti þessar tölur um gjaldþrot og nýskráningar nú í morgun.

„Óhætt er að segja að flestir hafi í upphafi síðasta árs vonast til þess að það met yrði ekki slegið og að birta tæki til í atvinnulífinu," segir í Morgunkorninu.

„Þær vonir hafa því miður brugðist enda hefur fjárhagsleg endurskipulagning fyrirtækja gengið mun hægar fyrir sig en vonast var til, efnahagsbatanum hefur seinkað og lítið hefur verið um fjárfestingar í atvinnulífinu. Horfur fyrir árið eru þó bjartari og gert er ráð fyrir að hagvöxtur taki við af samdrætti á þessu ári og því má því reikna með að fjöldi gjaldþrota fyrirtækjum fari fækkandi að sama skapi."