IFS greining spáir 2,7% verðbólgu í apríl

Verðbólguspá IFS greiningar fyrir apríl hljóðar upp á hækkun vísitölu neysluverðs um 0,7%. Til samanburðar var hækkun vísitölunnar 0,25% (3% á ársgrundvelli) í apríl 2010. Ef spáin gengur eftir, mun 12 mánaða verðbólga mælast 2,7% og verður þar með komin aftur yfir 2,5% verðbólgumarkmið Seðlabankans.

Í tilkynningu segir að verðbólga undanfarna þrjá mánuði á ársgrundvelli hækkar úr 5% í 12%. Hagstofan mældi vísitölu neysluverðs í síðustu viku en niðurstöðurnar verða birtar fimmtudaginn 28. apríl n.k.

Verð á bensíni hefur hækkað um 3,3% og dísel um 2,7% frá síðustu mælingu (samtals vísitöluáhrif: +0,18). Flugfargjöld í utanlandsflugi lækkuðu lítillega í mars og gerum við ráð fyrir 10% hækkun, aðallega vegna mikilla eldsneytisverðhækkana undanfarið(vísitöluáhrif: +0,12).

Samkvæmt gögnum FMR hefur fermetraverð hækkað um 1,3% síðustu þrjá mánuði, aðallega vegna fjölbýlis (vísitöluáhrif: +0,16).

Mánaðarleg verðmæling IFS bendir til 0,9% hækkunar á verði matarkörfunnar (vísitöluáhrif: +0,13%) eftir að hafa hækkað um 1,4% í janúar og 0,8% í febrúar og lækkað um 0,2% í mars. Mæling á verði matarkörfunnar er framkvæmd á ákveðnum vörum sem nær ávallt eru til sölu og svo virðist sem að þær hafi stöðugt hækkað í verði frá því í desember.

Nokkurrar óvissu gætir um þróun hrávöruverðs næstu mánuðina. Olíuverð gæti tekið að lækka og það gæti haft tímabundin hjöðnunaráhrif á íslenskt verðlag. Innflutt verðbólga er því einn stærsti óvissuþátturinn sem og mögulegar launahækkanir innanlands sem aftur gætu þrýst upp verðlagi. Bráðabirgðaspá okkar fyrir maí frá því í janúar hljóðaði uppá 0,2% hækkun VNV en eins og áður sagði ríkir þónokkur óvissa um þróunina á næstunni.