Þjóðhagsvarúð sé í forgangi við fjármálaeftirlit

Seðlabanki Íslands hefur birt skýrslu um hlutverk seðlabanka í fjármálaeftirliti. Ein megin ályktunin sem dregin hefur verið af reynslu við fjármálaeftirlit undanfarin ár er að setja þurfi svokallaða þjóðhagsvarúð í forgang við hönnun nýrrar umgjarðar fyrir fjármálaeftirlit.

Í tilkynningu segir að skýrslan er unnin í kjölfar viðbragða við fjármálakreppunni, bæði alþjóðlega og hér á landi, en Alþingi hefur m.a. lýst vilja sínum til að endurskoða löggjöf um eftirlit með fjármálastarfsemi og á sviði seðlabanka.

Í skýrslunni er fjallað um fjármálakerfi, hlutverk fjármálaeftirlits og seðlabanka, um mismunandi aðferðir og skipulag við fjármálaeftirlit í heiminum og þar með talið þær hugmyndir sem nú eru efst á baugi varðandi bætt fjármálaeftirlit.

Í skýrslunni kemur fram að ein megin ályktunin sem dregin hefur verið af reynslu við fjármálaeftirlit undanfarin ár er að setja þurfi svokallaða þjóðhagsvarúð í forgang við hönnun nýrrar umgjarðar fyrir fjármálaeftirlit. Fram kemur að helstu stýritæki á sviði þjóðhagsvarúðar sem nú eru til skoðunar séu breytileg eiginfjárhlutföll, lausafjárkvaðir og breytileg hámörk veðsetningarhlutfalla.

Skýrslan er ætluð sem upplýsandi innlegg af hálfu Seðlabanka Íslands í þá umræðu sem nú fer fram um bætt regluverk og eftirlit með fjármálastarfsemi hér á landi, en hún felur ekki í sér beina tillögu um efnið.