Gætu varpað ljósi á lánveitingar Kaupþings

Gögn sem sérstakur saksóknari fær afhent frá Lúxemborg gætu varpað ljósi á háar lánveitingar til eignarhaldsfélaga sem fengu lán til að kaupa skuldatryggingar og hlutabréf Kaupþings banka.

Embætti sérstaks saksóknara hefur til rannsóknar meinta markaðsmisnotkun Kaupþings banka en talið er að gögn frá Kaupþingi banka í Lúxemborg, sem nú starfar undir heitinu Banque Havilland, hafi verulega þýðingu fyrir rannsókn málsins.

Sérstakur saksóknari er meðal annars að rannsaka lánveitingar Kaupþings í Lúxemborg til eignarhaldsfélaga sem fengu lán til að kaupa hlutabréf í Kaupþingi og skuldatryggingar á bankann.

Fram kemur í skýrslu rannsóknarnefndar Alþingis að Kaupþing banki hafi verið milliliður við sölu á skuldatryggingum á sjálfan sig. Útgefandi lánshæfistengda skuldabréfsins var Deutsche Bank, þ.e. kaupandi skuldatryggingar, en kaupendur skuldabréfsins og þar með seljendur skuldatryggingarinnar voru stórir viðskiptavinir Kaupþings banka.

Nokkur félög sem voru í viðskiptum við Kaupþing í Lúxemborg keyptu lánshæfistengd skuldabréf af Deutsche Bank. Kaupþing í Lúxemborg lánaði félögunum Trenvis Ltd., Charbon Capital Ltd. og Holly Beach til þess að fjármagna félagið Chesterfield United, sem var í eigu Kevin Stanford, Karen Millen Tony Yerolemou og Skúla Þorvaldssonar, upp á alls 130 milljónir evra til að kaupa skuldatryggingar á Kaupþing. Grunur leikur á að kaup á skuldatryggingum gegnum viðskiptavini hafi verið tilraun af hálfu Kaupþings banka til að hafa áhrif á verð skuldatrygginganna.

Félögin keyptu tryggingar á sama tíma og verðmyndun á markaði með skuldatryggingar Kaupþings var bankanum mjög óhagstæð. Sigurður Einarsson, fyrrverandi stjórnarformaður Kaupþings, sagði í bréfi til vina og vandamanna í janúar árið 2009 ári að Kaupþing hefði gripið til þess ráðs að lána traustum viðskiptavinum til þess að kaupa tryggingarnar að tillögu Deutsche Bank. Skuldatryggingarálagið á Kaupþing hefði farið hækkandi og stjórnendur hefði grunað að verið væri að spila með tryggingarnar.

Hæstiréttur Lúxemborgar hefur nú úrskurðað að lögreglunni í Lúxemborg beri að afhenda sérstökum saksóknara gögn sem haldlögð voru í húsleit hjá Banque Havilland í Lúxemborg hinn 12. febrúar á síðasta ári. Talið er að gögnin hafi verulega þýðingu fyrir rannsókn á lánveitingum Kaupþings í Lúxemborg til áðurnefndra félaga. Þá er talið að gögnin varpi ljósi á ýmis viðskipti og skýri viðskiptafléttur hjá bankanum fyrir bankahrunið.