Umfjöllun: Öruggur sigur ÍR-inga á Haukum

ÍR vann öruggan sigur á Haukum í Iceland Express deild karla í kvöld, 104-86. Sigur ÍR-inga var í raun aldrei í hættu og komust þeir mest í 26 stiga forskot í leiknum.

Gestirnir úr Hafnarfirðinum reyndu hvað þeir gátu í síðasta leikhlutanum en ÍR-ingar gáfu ekkert eftir og héldu áfram frábærri spilamennsku sinni bæði í vörn og sókn sem skóp þennan sigur. Með sigrinum er ÍR komið í 7.sæti með 14 stig en Haukar detta niður um eitt sæti í það sjötta með 16 stig.

Kelly Biedler var stigahæstu heimamanna með 34 stig, og Nemanja Sovic var með 23 stig. Hjá Hafnfirðingum var Semaj Inge með 20 stig og Gerald Robinson 15 stig.

Heimamenn í ÍR byrjuðu leikinn af krafti og voru greinilega staðráðnir í að fylgja eftir sigurleiknum gegn Grindavík í síðustu umferð. ÍR-ingar tóku strax forystu í leiknum 6-2 og létu þá forystu aldrei af hendi og komust mest í 13 stiga forystu í fyrsta leikhluta 26-13, og leiddi svo með 12 stigum 32-20 eftir fyrsta leikhlutann.

Hafnfirðingar komu ákveðnir til leiks í annan leikhluta og skoruðu fyrstu 7 stigin og minnkuðu muninn í 5 stig, 32-27. Gunnar Sverrisson þjálfari ÍR tók þá leikhlé og las vel yfir sínum mönnum og þeir svöruðu með því að skora næstu 9 stigin í leiknum.

ÍR-ingar gáfu ekkert eftir í baráttunni og náðu mest 16 stiga forystu, 50-34. En lokastaðan í fyrri hálfleik var 57-44 heimamönnum í vil. Kelly Biedler var atkvæðamestur heimamanna í fyrrihálfleik með 23 stig. Hjá gestunum var Semaj Inge með 8 stig.

Þriðji leikhlutinn hjá heimamönnum skóp sigurinn en þeir og komust mest í 25 stiga forrystu 80-55 þegar þriðja leikhlutanum var að ljúka. Staðan fyrir lokaleikhlutann var 80-57 og heimamenn í vænlegri stöðu.

Lokaleikhlutinn varð aldrei spennandi. Haukar reyndu hvað þeir gátu til að saxa á forskotið en komust ekkert áfram á móti öflugum ÍR-ingum. Semaj Inge hrökk aðeins í gang í lokaleikhlutanum og skoraði 10 stig en það var bara ekki nóg og sigur heimamanna því aldrei í hættu. Lokastaðan 104-86.

ÍR-Haukar 104-86 (32-20, 25-24, 23-13, 24-29)

ÍR: Kelly Biedler 34 stig, 13 fráköst, 3 varin skot, Nemanja Sovic 23, James Bartolotta 19/7 stoðsendingar, Sveinbjörn Claesson 12, Eiríkur Önundarson 11, Níels Dungal 3/5 stoðsendingar, Tómas Aron Viggóson 2.

Haukar: Semaj Inge 20/10 fráköst/5 stoðsendingar/5 stolnir, Gerald Robinson 15/7 fráköst, Davíð Páll Hermannsson 11, Örn Sigurðarson 11/4 fráköst, Haukur Óskarsson 8, Sveinn Ómar Sveinsson 8/5 fráköst, Sigurður Þór Einarsson 6, Emil Barja 5/4 fráköst, Óskar Ingi Magnússon 1, Guðmundur Kári Sævarsson 1.