Fulltrúar frá 14 löndum á Mid-Atlantic ferðakaupstefnunni

Ferðakaupstefnan Mid-Atlantic 2011 er stærsta ferðakaupstefnan sem haldin er á Íslandi. Hún er nú haldin í 19. sinn.

Kaupstefnan er haldin á vegum Icelandair til þess að tengja saman kaupendur og seljendur ferðaþjónustu í þeim tilgangi að styrkja og auka ferðamannastraum til Íslands. Hún er árlegur lykilviðburður í ferðaþjónustunni. Hún stendur nú yfir dagana 3.-6. febrúar og fer fram í Laugardalshöllinni.

Katrín Júlíusdóttir, ráðherra ferðamála, mun heimsækja kaupstefnuna um klukkan tvö í dag.

Fulltrúar á Mid-Atlantic eru nú yfir 500 alls frá 14 löndum. Að þessu sinni koma um 300 fulltrúar frá þeim löndum sem hafa mikil ferðaþjónustutengsl við Ísland í Evrópu og Norður-Ameríku. Sérstaka athygli vekur jafnan þegar nýir aðilar kynna sig til leiks og í ár verða meðal þátttakenda sendinefndir frá Seattle og Washington í Bandaríkjunum og frá Árósum, Óðinsvéum, Billund og fleiri stöðum í vestanverðri Danmörku að ógleymdum fulltrúum Lególands sjálfs.

Þátttakendur eru fulltrúar ferðaskrifstofa, hótela, bílaleiga, skemmtigarða og margvíslegra annarra ferðaþjónustufyrirtækja og að auki taka þátt ferðamálaráð á norðurlöndum og ferðamálaráð þeirra svæða og borga sem Icelandair flýgur til í Norður-Ameríku.

„Mikilvægi ferðaþjónustunnar fyrir íslenskt samfélag hefur aukist og það er áríðandi fyrir okkur að grípa öll þau viðskiptatækifæri sem bjóðast," segir Helgi Már Björgvinsson, framkvæmdastjóri sölu- og markaðssviðs Icelandair.

„Þau tengsl sem myndast á Mid-Atlantic eru ein af undirstöðum í ferðþjónustunni. Sá aukni áhugi sem við finnum. erlendis frá er þess vegna mjög ánægjulegur. Þetta er einn helsti vettvangur fyrir íslenska ferðaþjónustu að selja og kynna sína vöru beint fyrir kaupendum. En einnig eru hér til dæmis bandarísk fyrirtæki að kaupa ferðaþjónustu frá Norður-Evrópu sem þeir síðan selja neytendum vestra og öfugt. Ísland er miðpunkturinn í öllu þessu starfi, líkt og í leiðarkerfi okkar, en á kaupstefnunni eru kynningarfundir, sölusýningar, stuttar ferðir og þemakvöld," segir Helgi Már.