Vinnutölvan kölluð upp í símann

Það getur komið sér vel að geta tengst vinnutölvunni heima í stofu. Til þessa hefur fartölva og VPN-tenging verið sú leið sem liggur beinast við þegar sú aðstðaða kemur upp. Eins og margir kannast eflaust við getur slíkt pirrað betri helminginn.

Með tiltölulega nýlegri sýndarlausn frá bandaríska tæknifyrirtækinu VMWare er hægt að ganga enn lengra og tengjast vinnuumhverfinu með bæði farsíma og spjaldtölvu óháð því hvar í heiminum viðkomandi er staddur. Þetta getur að sjálfsögðu komið sér vel fyrir margar starfsstéttir, svo sem lækna og kennara sem þurfa að fara á milli stofa en þurfa að nálgast upplýsingar úr vinnutölvum sínum.

Engu skiptir hvaða stýrikerfi er keyrt á farsímanum eða spjaldtölvunni, vinnuumhverfið, sem vistað er miðlægt á netþjóni, er hægt að kalla fram með mjög einföldum hætti svo lengi sem nettenging er til staðar.

Reyndar má komast hjá nettengingunni þegar sinna þarf vinnu í flugi. Þegar svo stendur á er mögulegt að afrita vinnuumhverfið yfir á ferðatölvu, vinna á hana á meðan flugi stendur og senda breytingarnar sjálfvirkt aftur til miðlægs netþjóns eftir lendingu þegar til áfangastaðar er komið.

Nokkrir þættir þurfa að vera fyrir hendi til að tengjast tölvum með þessum hætti. Í fyrsta lagi þarf fyrirtækið sem viðkomandi starfar hjá að hafa komið sér upp miðlægu vinnuumhverfi. Í öðru lagi þarf að nálgast forrit í netverslun fyrir snjallsíma, spjaldtölvur og þau stýrikerfi sem þau keyra á (e. app) og setja það upp.

Guðmundur Arnar Þórðarson, lausnaráðgjafi hjá Nýherja, segir sýndarlausn sem þessa geta aukið verulega hagræði fyrir alla, hvort heldur er fyrir starfsmenn fyrirtækja og fyrirtækin sjálf. Starfsmenn fyrirtækja séu frjálsari en áður enda þurfi þeir ekki að hanga fyrir framan tölvur sínar. Í ofanálag geta þeir ráðið því sjálfir hvernig tæki þeir nota til að kalla vinnuumhverfi sitt fram. Í þriðja lagi er öryggið meira en áður; vinnugögn eru vistuð á miðlægu neti og því glatast þau ekki týnist tölvan eða tækið sem unnið er á hverju sinni. Gögnin eru dulkóðuð og því getur þriðji aðili ekki komist í þau.

Hvað fyrirtækin varðar þá geta þau sparað sér háar fjárhæðir með miðlægri vistun útstöðva og gagna og því komist hjá því að kaupa og reka hefðbundnar útstöðvar. Til þess er VMware-sýndarvæðing vel fallin en hún býður uppá að keyra mörg stýrikerfi samtímis á einum eða fleiri netþjónum. Þegar hefðbundnum útstöðvum er skipt út fyrir léttari tæki, spari fyrirtækið rafmagn. „Fyrirtækið geta sparað allt að ellefu þúsund krónur á ári fyrir hvern notanda í rafmagni” segir Guðmundur.

Sýndarvæðing útstöðva – eins og þessi möguleiki er kallaður á fagmáli – er nú þegar í prófunum hjá nokkrum fyrirtækjum hér á landi. Guðmundur segir þetta risastórt skref, kannki eitt það stærsta sem stigið hafi verið frá því einmenningstölvan kom á markað.