Steve-O vill ekkert áfengi í augsýn

Ólátabelgurinn Steve-O er væntanlegur til landsins og hyggst halda sýningu í Háskólabíói í nóvember. Steve-O kom til landsins fyrir áratug og var þá háður eiturlyfjum og áfengi. Hann er breyttur maður í dag og hefur sagt skilið við eiturlyfjadjöfulinn.

Kröfulisti kappans er litaður þessum nýja og heilbrigða lífsstíl, en hann hefur því gefið skýr fyrirmæli um að ekkert áfengi megi vera baksviðs eða inni á hótelherberginu sem hann gistir í. Þá biður hann ekki um mikið, en vill þó kaffi og gos, en engar dýraafurðir þar sem hann er grænmetisæta.

Sviðsmunirnir sem hann biður um gefa að vissu leyti til kynna hvað fer fram í Háskólabíói, en þar eiga að bíða hans barstóll, sítróna, brúsi af hárlakki og beittur eldhúshnífur.