MP Banki tapaði 1,6 milljarði í fyrra

Rekstur MP Banka skilaði tæplega 1,6 milljarða kr. tapi fyrir skatta í síðasta ári. Þetta kemur fram í Viðskiptablaðinu.

Á vefsíðu blaðsins segir að í kynningargögnum sem kröfuhöfum, hluthöfum og væntanlegum fjárfestum MP Banka voru kynnt í lok síðasta árs er farið yfir rekstur MP Banka á árinu 2010. Viðskiptablaðið hefur gögnin undir höndum. Þar er byggt á rekstrarniðurstöðu óskipts banka fyrstu tíu mánuði ársins og áætlun um hvernig þeir tveir síðustu myndu þróast.

Líkt og Viðskiptablaðið hefur greint frá er nú unnið að uppskiptingu bankans og munu nýir eigendur eignast viðskiptahluta bankans að stærstum hluta.

Í tölunum kemur fram að rekstrartekjur bankans voru 1.119 milljónir króna á árinu. Rekstrarkostnaður var hins vegar 1.998 milljónir króna og virðisrýrnun útlána 705 milljónir króna. Því var rekstrarafkoma MP Banka fyrir skatta neikvæð um 1.584 milljónir króna á síðasta ári.

Mestu munaði um að fjárfestingartekjur, sem eru tekjur eða tap vegna stöðutöku bankans á markaði, voru neikvæðar um 728 milljónir króna og þóknanatekjur hans námu einungis 844 milljónum króna. Í kynningunni stendur að „þó vænt afkoma ársins 2010 sé slæm hefur orðið verulegur viðsnúningur á seinni hluta ársins og hafa eigin viðskipti skilað 184,6 m.kr. hagnaði síðustu þrjá mánuði".