Ný iPad-tölva handan við hornið

Bandaríski tæknirisinn Apple sviptir í dag hulunni af næstu kynslóð iPad-spjaldtölvunnar.

Fyrsta kynslóð tölvunnar kom á markað í apríl í fyrra. Beðið hefur verið með nokkurri eftirvæntingu eftir þessari nýjustu spjaldtölvu og mikið spekúlerað í því hvað hún muni bera og innhalda.

Netmiðillinn MacRumors er eðli málsins samkvæmt meðal þeirra öflugustu í fréttaskrifum um væntanlegar tækninýjungar frá Apple. Þar sagði í vikubyrjun að vísbendingar væru um að tölvan, eða einhver eintök hennar, verði hvít að lit.

Netmiðillinn Engadget bætir því við að búkurinn verði líklega tíu grömmum léttari og rétt örlítið þynnri en forverinn, minnið stærra, hraðvirkari A5-örgjörvi og hugsanlega myndavélar bæði að framan og aftan, sú að framan ætluð fyrir vefspjall. Myndavélarnar voru einmitt það sem notendur fyrstu iPad-tölvunnar fundu helst að henni. Bandaríska dagblaðið San Francisco Chronicle hnýtir við að forstjórinn, Steve Jobs, muni ekki kynna tölvuna þar sem hann sé í veikindaleyfi. Líklegasti staðgengill hans sé Phil Schiller, aðstoðarforstjóri markaðsmála hjá Apple, en hann kynnti iPhone 3Gs til sögunnar fyrir tveimur árum þegar Jobs gat það ekki. - jab