Fagna aldarfjórðungsafmæli á Íslenska markaðsdeginum

Íslenski markaðsdagurinn verður haldinn á föstudaginn, en í ár eru sannkölluð tímamót hjá markaðsfólki og ÍMARK. Félagið fagnar 25 ára afmæli sínu en um leið verður Lúðurinn, íslensku auglýsingaverðlaunin, afhentur í 25. skipti.

Gunnar B. Sigurgeirsson, formaður ÍMARK, segir í samtali við Markaðinn að dagskráin hafi sjaldan verið glæsilegri enda mikið lagt í viðburðinn. Þrír erlendir fyrirlesarar verða á ráðstefnunni, þar á meðal Scott Bedbury, sem er fyrrum markaðsstjóri Starbucks og Nike og hugmyndasmiður herferðarinnar Just Do It fyrir síðarnefnda fyrirtækið.

„Koma Scotts er hvalreki fyrir íslenskt markaðsfólk. Fólk sem kemur að markaðsmálum mun vafalítið sækja sér þekkingu og styrkingu í starfi með því að sækja ráðstefnuna,“ segir Gunnar.

Meðal umfjöllunarefna á ráðstefnunni eru hinir svokölluðu nýmiðlar og notkun þeirra í markaðsstarfi. „Markaðsfólk hefur mikinn áhuga á nýmiðlum og vill vita meira um það hvernig á að fóta sig á þeim vettvangi,“ segir Gunnar. „Það gildir það sama um þá og aðrar leiðir til að koma skilaboðum á framfæri til neytenda.“

Gunnar segir að fyrirlesarar á ráðstefnunni muni vafalítið fjalla um þetta og vonandi gefa áheyrendum dæmi um hvernig hægt sé að koma skilaboðum á áhrifaríkan hátt til neytenda með farsímum, samfélagsvefjum og fleiri slíkum miðlum.

Gunnar bætir því við að vissulega hafi harðnað á dalnum í auglýsinga- og markaðsgeiranum, en nú sé ljóst að þeir sem héldu sínu striki séu að koma betur undan kreppu en þeir sem drógu úr markaðsstarfsemi.

„Vissulega hafa fyrirtæki þurft að laga sig að breyttu ástandi frá því í lok árs 2008 hafa sum fyrirtæki virkilega styrkt sína stöðu með öflugu markaðsstarfi og munu sannarlega njóta ávaxtanna þegar markaðurinn réttir úr kútnum. Öflugt og markvisst markaðsstarf er svo sannarlega mikilvægur partur af verðmætasköpun fyrirtækja.“

Ráðstefnan hefst kl. 9 á Hilton Nordica og stendur til kl. 16.

- þj