Markaðsstjóri farinn frá N1

Gunnlaugur Þráinsson, markaðsstjóri olíuverslunarinnar N1 hætti störfum fyrir um mánuði. Hann vildi ekki tjá sig um málið í samtali við Fréttablaðið að öðru leyti en því að hann hefði sagt upp.

Uppsögnin kemur nokkuð á óvart innan auglýsingageirans enda Gunnlaugur með reyndari mönnum. Hann var á árum áður einn af eigendum og framkvæmdastjóri auglýsingastofunnar Gott fólk og er sagður hafa skilað því að N1 hlaut markaðsverðlaun ÍMARK, félags íslensks markaðsfólks, fyrir tveimur árum.

Ekki náðist í Hermann Guðmundsson þegar eftir því var leitað í gær. Eftir því sem næst verður komist hefur enginn verið ráðinn í stað Gunnlaugs en Katrín Guðjónsdóttir, hægri hönd hans, hefur verið gerð að deildarstjóra markaðsdeildar. Í kringum næstu áramót mun skoðað hvort nýr markaðsstjóri verði ráðinn. - jab