Seðlabankinn dregur töluvert út hagvaxtarspá sinni

Seðlabankinn hefur dregið töluvert úr spá sinni um hagvöxt á árinu. Nú telur bankinn að hagvöxturinn verði um 2,3% en í spá sinni í febrúar s.l. taldi bankinn að hann yrði 2,8% á árinu.

Þetta kemur fram í Peningamálum Seðlabankans sem gefin voru út í morgun samhliða vaxtaákvörðuninni.  Þar segir að útlit er fyrir að samdráttur landsframleiðslu á síðasta ári hafi verið meiri en Seðlabankinn gerði ráð fyrir í byrjun febrúar eða 3,1% í stað 2,7%. Hann er þó í áætlun Seðlabankans minni en bráðabirgðatölur Hagstofunnar gefa til kynna, en samkvæmt þeim nam samdrátturinn 3,5%.

Áfram er talið að landsframleiðslan hafi byrjað að aukast á ný milli ársfjórðunga um mitt ár í fyrra. Spá Seðlabankans frá því í febrúar gerði ráð fyrir að batinn yrði nokkuð brokkgengur og að tímabundið bakslag yrði í ársfjórðungsvexti landsframleiðslunnar á fyrri hluta þessa árs.  Nú virðist hins vegar sem bakslagið hafi verið heldur fyrr á ferðinni og komið á síðasta fjórðungi síðasta árs. Skýrist það að mestu af kröftugri innflutningi en áður var spáð.

Útlit er fyrir að hagvöxtur á þessu ári verði um 2,3%, sem er nokkru minna en spáð var í febrúar. Jafnframt er gert ráð fyrir minni hagvexti á næstu tveimur árum eða rétt undir 3% á ári í stað rúmlega 3%. Bætast þessar verri horfur við að nú er talið að samdráttur síðasta árs hafi verið meiri. Það að vöxtur innlendrar eftirspurnar beinist meira að innflutningi en áður var gert ráð fyrir skýrir lakari hagvöxt á þessu ári þrátt fyrir meiri vöxt þjóðarútgjalda og útflutnings.

Eins og í fyrri spám Seðlabankans er gert ráð fyrir að innlend eftirspurn verði helsti drifkraftur hagvaxtar á næstu árum en að framlag utanríkisviðskipta verði neikvætt.

Þegar landsframleiðslan náði lágmarki um mitt síðasta ár hafði hún dregist saman um 11½% frá því að hún náði hámarki í aðdraganda fjármálakreppunnar en nú er hún talin tæplega 11% lægri. Hafa verður þó í huga að í aðdraganda kreppunnar var landsframleiðslan orðin töluvert umfram það sem talist getur sjálfbært.

Miðað við horfur um hagvöxt næstu tveggja ára er talið að þessi tapaða framleiðsla verði að fullu endurheimt í lok spátímans, um mitt ár 2014.