Söngbók jólasveinanna

„Það má segja að bæði atvinnu- og frístundatónlistarmenn hafa alltaf verið í vandræðum með að útvega laglínur og hljómagang jólasöngva," svarar Gylfi Garðarsson þegar við forvitnumst um tilurð bókanna Jólasöngvar-Nótur og Jólasöngvar-Textar.

„Það voru sömu vandræðin fyrir hver einustu jól," bætir hann við.

„Með ærinni fyrirhöfn reyndu menn að verða sér úti um einhver erlend rit ásamt fátæklegu úrvali af íslensku efni og með afrtiun, klippingum og límingum á lausablöð var reynt að sameina jólalögin í eina nothæfa vinnumöppu."

„Og þá var eftir að æfa og troða upp. Hvort sem menn spiluðu á barnajólaböllum, á jólahlaðborðum veitingastaðanna eða bara heima í fjölskyldujólaboðinu þá voru allir í sömu vandræðunum," segir Gylfi.

„Meira að segja íslenskum jólatextum var erfitt að safna saman fyrir 1996 þar sem aðeins hluti þeirra var til á bókum, bara stakir eða fáeinir textar og alls ekki í því formi sem flestir þurfa."

„Þetta er forsagan að þeirri hugmynd minni að safna um 100 jólasöngvum saman í tvær samhæfðar bækur þar sem nótubókin nýttist tónlistarmönnum en textabókin hverjum sem vill syngja með sínu nefi."

„Kaflar og lagaröð eru eins í báðum bókum þannig að stjórn hópsöngs eins og í skólum verður margfalt auðveldari."

Hvernig hafa viðtökurnar verið? „Nokkuð magnaðar þó ekki kæmust þær á forsíður dagblaðanna," svarar Gylfi og segir:

„Tónmenntakennarar elska þetta bókasett, kennarinn með nótubókina og bekkurinn með textabækurnar."

„Hjá tónlistarmönnum sem eru virkir í jólavertíðinni urðu Jólasöngvar-Nótur strax vinsælasta jólabókin á hverju ári, loksins gátu þeir notið aðventunnar án þess að svitna við möppuvinnu."

„Þannig eru að minnsta kosti umsagnirnar sem ég fæ hjá þeim sem nota bækurnar," segir Gylfi.

Sjá nánar Songbok.is.