Beinagrindurnar rúlla úr skápum Amagerbanken

Tölurnar um hugsanlegt tap vegna gjaldþrots Amagerbanken fara hækkandi eftir því sem líður á morguninn. Nú er talið að tapið geti numið allt að 9 milljörðum danskra kr. eða vel yfir 180 milljarða kr.

Í umfjöllun Jyllands Posten um málið undir fyrirsögninni „Beinagrindurnar rúlla út úr Amagebanken" segir að tæplega 170 lánasamninga bankans og viðskiptavina hans þurfi að rannsaka nánar.

Þetta kom fram á blaðamannafundi í morgun sem Niels Heering stjórnarformaður bankans efndi til. Heering tók við embættinu í nóvember s.l. en síðan hafa fjórir aðilar utan bankans verið fengnir til að kanna lán bankans og veðin að baki þeim. Langstæsti hluti lánanna var til fasteignafélaga.

Heering tók sem dæmi 300 milljón danskra kr. lán sem Amagerbanken veitt einum viðskiptavina sinna árið 2009. Aðeins þremur mánuðum síðar átti viðskiptavinurinn í erfiðleikum með að borga af láninu. „Þetta er dæmi um ranga viðskiptavini sem allt of mikið var af í Amagerbanken," segir Heering og bætir því við að aðrir bankar höfðu áður hafnað lánaóskum frá þessum viðskiptavinum.

Í máli Heering kom fram hörð gagnrýni á fyrri stjórn og bankastjóra Amagerbanken. Hann segir þá hafa verið lélega fagmenn sem tóku alltof mikla áhættu í tengslum við lánveitingar sínar til fasteignafélaga.