Danskir kornbændur hagnast um 120 milljarða

Danskir kornbændur eiga í vændum 6 milljarða danskra kr. eða yfir 120 milljarða kr. búbót sökum hinna miklu verðhækkana á korni undanfarið ár. Þetta kemur fram í Jyllands Posten í dag.

Fram kemur í blaðinu að réttast væri hjá kornbændunum að bíða aðeins með því að taka inn þennan hagnað því frekari hækkanir á korni eru framundan á þessu ári.

Verð fyrir hver 100 kíló af hveiti hefur hækkað úr 75 krónum dönskum og í um 150 krónur á liðnu ári og verðið fyrir hveiti til afhendingar í Danmörku eftir síðustu haustuppskeru liggur nú í kringum 140 danskar kr. fyrir þetta magn. Þessar verðhækkanir þýða að haustuppskeran hefur aukist um 6 milljarða danskra kr. að verðmæti.

Sérfræðingar mæla með að dönsku kornbændurnir selji aðeins hluta af kornuppserku sinni núna og bíði með megnið þar til kemur fram á vorið.

Jakob Kjærsgaard hrávörugreinandi hjá Kornbasen segir að þeir mæli með við bændurna að þeir selji aðeins fjórðung af fóðurhveiti og byggi frá síðustu haustuppskeru og um helminginn af maltbygginu. Hinn hluta uppskerunnar eigi bændurnir að bíða með að selja fram til vorsins.