Fleiri kaupa húsgögn og raftæki - sala á áfengi dettur niður

Velta húsgagnaverslana jókst um 6,6% í janúar frá sama mánuði í fyrra á föstu verðlagi og um 9,3% á breytilegu verðlagi. Verð á húsgögnum var 2,5% hærra í janúar síðastliðnum miðað við sama mánuð í fyrra.

Velta sérverslana með rúm jókst í janúar um 33,2% frá sama mánuði í fyrra á föstu verðlagi. Velta í sölu skrifstofuhúsgagna var 8,4% meiri í janúar síðastliðnum samanborið við sama mánuð í fyrra á föstu verðlagi.

Þette kemur fram í smásöluvísitölu Rannsóknarseturs verslunarinnar.



Ríflega fjórðungs aukning á sölu raftækja

Sala á raftækjum í janúar jókst um 26,5% á föstu verðlagi frá sama mánuði í fyrra og um 13,9% á breytilegu verðlagi á sama tímabili. Verð á raftækjum lækkaði um 10,0% frá janúar 2010.

Velta í dagvöruverslun jókst um 2,4% á föstu verðlagi í janúar miðað við sama mánuð í fyrra og um 3,1% á breytilegu verðlagi. Leiðrétt fyrir árstíðabundnum þáttum jókst velta dagvöruverslana í janúar um 4,2% frá sama mánuði í fyrra. Verð á dagvöru hækkaði um 0,8% á síðastliðnum 12 mánuðum.

Sala á fötum, áfengi og skóm minnkar

Sala áfengis dróst saman um 6,4% í janúar miðað við sama mánuð í fyrra á föstu verðlagi og um 6,0% á breytilegu verðlagi. Leiðrétt fyrir árstíðabundnum þáttum nam samdráttur í veltu áfengis í janúar 3,9% frá sama mánuði í fyrra. Verð á áfengi var 0,5% hærra í janúar síðastliðnum en í sama mánuði í fyrra.

Fataverslun var 14,2% minni í janúar miðað við sama mánuð í fyrra á föstu verðlagi og minnkaði um 14,1% á breytilegu verðlagi á sama tímabili. Leiðrétt fyrir árstíðabundnum þáttum dróst velta fataverslunar í janúar saman um 13,1% frá sama mánuði árið áður. Verð á fötum hækkaði um 0,1% í janúar síðastliðnum frá sama mánuði ári fyrr.

Velta skóverslunar minnkaði um 4,0% í janúar á föstu verðlagi og um 6,1% á breytilegu verðlagi miðað við sama mánuð í fyrra. Verð á skóm lækkaði um 2,2% frá janúar í fyrra.