Matorka ætlar að auka fiskeldi um 60% á Íslandi

Matorka ætlar að auka fiskeldi á Íslandi um 60% með því að byggja 3.000 tonna eldisstöð. Nýting lághita jarðvarma til hlývatnseldis er lykillinn að áformum Matorku.

Þetta kemur fram í tilkynningu frá iðnaðarráðuneytinu. Þar segir að áætlanir fyrirtækisins gera ráð fyrir að í fyrsta þrepi verði byggð upp 3.000 tonna eldisstöð, en í dag er fiskeldi á Íslandi í heild um 5.000 tonn á ári.

Sem dæmi um framtíðarmöguleika Íslands má nefna að heildarframleiðsla fiskeldis í Danmörku er um 50 þúsund tonn og í Noregi um milljón tonn á ári. Það er því eftir miklu að slægjast!

Fulltrúar Matorku í félagi við kanadíska samstarfsaðila hafa gert víðreist um heiminn til að kanna fiskeldi og það er niðurstaðan að hér á landi séu aðstæður einstakar sökum jarðvarmans. Ræktun á Íslandi sé einstaklega hagkvæm, sjúkdómahættalítil og aðgangur að mörkuðum beggja vegna Atlantshafs góður. Ætlunin er að rækta nokkrar gerðir fiska í hlývatnseldi, m.a. vatnakarfa sem mikil eftirspurn er eftir.

Uppbyggingu fiskeldisins fylgja fjölmörg afleidd tækifæri, s.s. í framleiðslu á fóðri og fóðurhráefnum, nýtingu næringarríks affallsvatns til gróðurræktunar, fullvinnslu afurða og svona mætti lengi telja.