Bandaríkjamenn fylgjast með söluferli Icelandic Group

Bandarísk stjórnvöld fylgjast með söluferli Icelandic Group og vilja vita hvers vegna bandarískum fjárfestingasjóðum er ekki gefið tækifæri til að bjóða í félagið. Þetta kemur fram á vefsíðu Viðskiptablaðisins sem aftur vitnar í fréttamiðillinn IntraFish.

Líkt og komið hefur fram í fjölmiðlum, og sagt er frá í frétt IntraFish, á Framtakssjóður Íslands í viðræðum við evrópska fjárfestingasjóðinn Triton um sölu á félaginu. Ekki verður rætt við aðra mögulega fjárfesta á meðan. Segir að tveir bandarískir sjóðir séu óánægðir með að vera ekki hleypt að samningaborðinu. Sjóðirnir tveir starfa saman samkvæmt fréttinni.

Samkvæmt heimildum IntraFish er tilboð bandarísku sjóðanna hærra en það sem kanadíska félagið High Liner Foods bauð. High Liner Foods hefur einnig sýnt áhuga á félaginu og kvartað undan því að tilboð þeirra sé ekki skoðað.

Segir að fjárfestingarsjóðirnir tveir hafi sett sig í samband við bandaríska viðskiptaráðuneytið ( U.S. Department of Commerce) vegna málsins. Í kjölfarið var haft samband við íslenska stjórnmálamenn, sem hafa opinberlega mótmælt lokuðu söluferli á milli FSÍ og Triton.

Einnig kemur fram að bandarísk stjórnvöld hafi ekki einungis áhyggjur af málinu vegna fjárfestingasjóðanna heldur einnig vegna þeirra starfa sem eru undir í Virginíu. Þar er Icelandic USA staðsett. Heimildarmaður IntraFish segir að ef viðræður standi yfir lengur en til 31. janúar, sem var í gær, muni bandarísku sjóðirnir tveir fara fram á inngrip stjórnvalda.