Landspítalinn rekinn með tekjuafgangi

Landspítali var rekinn með 52 milljóna króna tekjuafgangi á árinu 2010 samkvæmt bráðabirgðaruppgjöri spítalans. Heildarvelta Landspítala í fyrra var 40,1 milljarður króna og þar af nam rekstrarframlag ríkissjóðs 33,1 milljarði. Ekki var um að ræða viðbótarfjárframlag til spítalans í fjáraukalögum fyrir árið 2010.

Tekjuafgangur upp á 52 milljónir er ríflega 0,1% af heildarveltu. Stærsti einstaki útgjaldaliður ársins var launagjöld upp á 25,5 milljarða sem er 1,2 milljörðum lægri en árið 2009. Starfmönnum fækkaði um 200 árið 2010 en þeim hefur fækkað um samtals 670 frá ársbyrjun 2009.

Lyfjakostnaður lækkaði um 12% árið 2010 eða 170 milljónir króna. Þá fækkaði rannsóknum, (myndgreining, blóðrannsóknir og ræktanir) um 17% frá árinu 2009. Fæðingum fækkaði um 2% og voru 3.420, samanborið við 3.500 árið 2009.

Sjúklingar sem leituðu á bráðamóttökur spítalans voru 91.482 sem er 3% fækkun frá fyrra ári. Meðallegutími sjúklings styttist úr 6,9 dögum í 6,7 daga.

Björn Zoëga, forstjóri Landspítal er sáttur við uppgjörið. Í tilkynningu segir hann spítalann hafa lækkað kostnað sinn um 3,4 milljarða.