Nýir lögmenn til liðs við Juris

Juris lögmannsstofa, lögmannsstofan Jónsson & Harðarson ehf. og Páll Ásgrímsson hdl. hafa ákveðið að sameina krafta sína undir merkjum Juris. Eftir þetta verða eigendur Juris þeir Andri Árnason, Halldór Jónsson, Lárus L. Blöndal, Páll Ásgrímsson, Sigurbjörn Magnússon, Stefán A. Svensson og Vífill Harðarson. Juris mun á næstu vikum flytja í nýtt og glæsilegt húsnæði að Borgartúni 26 í Reykjavík.

„Tilkoma þremenninganna í eigendahóp okkar er sérstakt ánægjuefni. Hér eru á ferðinni afar hæfir og reynslumiklir lögmenn sem koma með aukna breidd inn í okkar rekstur sem gerir Juris kleift að bjóða upp á enn víðtækari þjónustu og ráðgjöf, ekki síst sérhæfðari fyrirtækjaráðgjöf," segir Sigurbjörn Magnússon, hrl. og einn eigenda Juris í tilkynningu um málið.

Stofan er aðili að Globalaw, alþjóðlegu samstarfsneti lögmannsstofa en aðilar samstarfsins eru allir sérhæfðir á sviði viðskipta- og fyrirtækjalögfræði og hafa víðtæka alþjóðlega reynslu á því sviði. Við stækkunina verða starfsmenn stofunnar í kringum 25 talsins.

Halldór Jónsson hrl. lauk lögfræðiprófi frá Háskóla Íslands 1994 og varð hæstaréttarlögmaður árið 2003. Hann var sjálfstætt starfandi lögmaður frá 1997-2006, þar af hjá KPMG Lögmönnum ehf. og síðar sem einn eigenda Lex lögmannsstofu frá 1999 en þar áður hjá yfirskattanefnd og hjá umboðsmanni Alþingis. Á árunum 2006-2009 gegndi hann starfi aðallögfræðings Landsbankans í Lúxemborg en hefur frá apríl 2009 rekið lögmannsstofuna Jónsson & Harðarson þar sem hann hefur sérhæft sig í fyrirtækjaráðgjöf, einkum banka- og fjármálastarfsemi auk skattaréttar.

Páll Ásgrímsson hdl. lauk embættisprófi í lögum frá háskóla Íslands árið 1990 og meistaragráðu í Evrópurétti frá London School of Economics 1991. Hann öðlaðist réttindi sem héraðsdómslögmaður árið 1995. Hann hefur verið framkvæmdastjóri lögfræðisviðs Skipta og þar á undan Símans hf. frá árinu 1999. Áður starfaði hann m.a. hjá lagadeild eftirlitsstofnunar EFTA, sem yfirlögfræðingur Samkeppnisstofnunar og í viðskipta- og iðnaðarráðuneytinu. Þá hefur Páll setið í stjórnum fjölmargra fyrirtækja. Hann hefur því langa reynslu af fyrirtækjarekstri, alþjóðasamskiptum og lögfræðistörfum, einkum á sviði félaga- og samkeppnisréttar.

Vífill Harðarson hdl. lauk embættisprófi í lögfræði frá Háskóla Íslands árið 2002 og meistaraprófi í löggjöf á alþjóðlegum fjármálamörkuðum frá King's College í London 2010. Hann öðlaðist réttindi sem héraðsdómslögmaður 2003 og lauk prófi í verðbréfaviðskiptum 2005. Hann starfaði áður m.a. hjá Lex lögmannsstofu, Glitni banka og Novator en hefur rekið lögmannsstofuna Jónsson & Harðarson með Halldóri Jónssyni frá því í maí á síðasta ári þar sem hann hefur aðallega sinnt fyrirtækjaráðgjöf, einkum varðandi banka- og fjármálastarfsemi og fjármögnun.