Atvinnuþátttakan var 79,9% á fjórða ársfjórðungi

Fjöldi starfandi á fjórða ársfjórðungi 2010 var 165.600 manns og fækkaði um 900 frá sama tíma ári áður. Á vinnumarkaði voru alls 178.800 manns sem jafngildir 79,9% atvinnuþátttöku.

Fjallað er um málið á vefsíðu Hagstofunnar. Þar segir að atvinnuþátttaka karla var 83,5% og kvenna 76,2%. Til þeirra sem eru á vinnumarkaði teljast bæði þeir sem eru starfandi og atvinnulausir. Fólk telst vera starfandi ef það hefur unnið eina klukkustund eða meira í viðmiðunarviku könnunar eða verið fjarverandi frá starfi sem það gegnir að öllu jöfnu.

Á fjórða ársfjórðungi 2009 voru alls 178.500 á vinnumarkaði og atvinnuþátttaka mældist þá 80,3%. Atvinnuþátttaka karla var 83,3% og kvenna 77,3%.

Á fjórða ársfjórðungi 2010 var meðalfjöldi vinnustunda 38,3 klst. hjá þeim sem voru við vinnu í viðmiðunarvikunni, 42,6 klst. hjá körlum en 33,7 klst. hjá konum. Meðalfjöldi vinnustunda hjá þeim sem voru í fullu starfi var 44,3 klst. en 22,8 klst. hjá þeim sem voru í hlutastarfi.

Á fjórða ársfjórðungi 2009 var meðalfjöldi vinnustunda 38,9 klst., 42,9 klst. hjá körlum og 34,5 klst. hjá konum. Þeir sem voru í fullu starfi unnu 44,6 klst. að jafnaði en þeir sem voru í hlutastarfi unnu að jafnaði 23 klst.