Mikil sala raftækja fyrir jólin

Sala á raftækjum í desember jókst um 18,5% á föstu verðlagi frá sama mánuði í fyrra og um 6,1% á breytilegu verðlagi á sama tímabili. Verð á raftækjum lækkaði um 10,5% frá desember 2009.

Þetta kemur fram í yfirliti frá Rannsóknarsetri verslunarinnar. Þar segir að velta í dagvöruverslun jókst um 1,2% á föstu verðlagi í desember miðað við sama mánuð í fyrra og um 1,7% á breytilegu verðlagi. Leiðrétt fyrir árstíðabundnum þáttum dróst velta dagvöruverslana í desember saman um 1,4% frá sama mánuði árið áður. Verð á dagvöru hækkaði um 0,5% á síðastliðnum 12 mánuðum.

Sala áfengis dróst saman um 7,0% í desember miðað við sama mánuð í fyrra á föstu verðlagi og um 2,1% á breytilegu verðlagi. Leiðrétt fyrir árstíðabundnum þáttum nam samdráttur í veltu áfengis í desember 13,5% frá sama mánuði í fyrra. Verð á áfengi var 5,2% hærra í desember síðastliðnum en í sama mánuði í fyrra.

Fataverslun var 7,0% minni í desember miðað við sama mánuð í fyrra á föstu verðlagi og minnkaði um 8,2% á breytilegu verðlagi á sama tímabili. Leiðrétt fyrir árstíðabundnum þáttum dróst velta fataverslunar í desember saman um 13,6% frá sama mánuði árið áður. Verð á fötum lækkaði um 1,2% í desember síðastliðnum frá sama mánuði ári fyrr.

Velta skóverslunar minnkaði um 6,2% í desember á föstu verðlagi og um 2,3% á breytilegu verðlagi miðað við sama mánuð í fyrra. Verð á skóm hækkaði um 4,1% frá desember í fyrra.

Velta húsgagnaverslana var 7,7% minni í desember en í sama mánuði í fyrra á föstu verðlagi og minnkaði um 4,4% á breytilegu verðlagi. Verð á húsgögnum var 3,6% hærra í desember síðastliðnum miðaða við sama mánuð í fyrra. Velta sérverslana með rúm jókst í desember um 2,8% frá sama mánuði í fyrra á föstu verðlagi. Velta í sölu skrifstofuhúsgagna var 25,9% minni í desember síðastliðnum samanborið við sama mánuð í fyrra á föstu verðlagi.

Í yfirlitinu segir að ein ástæða þess að sala raftækja jókst meira en sala á öðrum hefðbundnum jólavörum getur verið sú að verð á raftækjum var 10,5% lægra en í desember fyrir ári. Líklegt er að innkaupaverð á raftækjum hafi lækkað sem hefur skilað sér í neytendaverði þar sem gengi krónunnar hefur styrkst að undanförnu. Sala raftækja hefur farið ört vaxandi frá því um mitt árið 2010.