Hætt við kaup á þremur Dreamliner þotum

Ekkert verður af því að Icelandair fái þrjár af fjórum nýjum Boeing Dreamliner B-787 þotum, sem félagið pantaði fyrir nokkrum árum. Pöntun á einni vél stendur eftir, en Dreamliner vélarnar marka upphaf nýrrar kynslóðar farþegavéla, hvað varðar rými, þægindi og eldsneytissparnað.

IG Invest, sem er systurfélag Icelandair og eignarhaldsfélag um flugvélar og flugvélatengdar eignir, hefur selt pantanirnar til Norwegian Air Shuttle. Í tilkynningu frá IG Invest, er ekki greint frá hversu mikið erlenda félagið greiddi fyrir að komast framar í pantanaröðina.