Vöruskiptin hagstæð um 109 milljarða á 11 mánuðum

Í nóvembermánuði voru fluttar út vörur fyrir tæpa 48,4 milljarða króna og inn fyrir 37,9 milljarða króna. Vöruskiptin í nóvember voru því hagstæð um 10,4 milljarða króna. Í nóvember 2009 voru vöruskiptin hagstæð um 1,8 milljarða króna á sama gengi.

Þetta kemur fram á vefsíðu Hagstofunnar. Fyrstu ellefu mánuðina 2010 voru fluttar út vörur fyrir 511,1 milljarð króna en inn fyrir tæpan 402,1 milljarð króna. Afgangur var því á vöruskiptunum við útlönd sem nam tæpum 109,0 milljörðum en á sama tíma árið áður voru þau hagstæð um 75,1 milljarð á sama gengi. Vöruskiptajöfnuðurinn var því 33,8 milljörðum króna hagstæðari en á sama tíma árið áður.



Fyrstu ellefu mánuði ársins 2010 var verðmæti vöruútflutnings 67,6 milljörðum eða 15,2% meira á föstu gengi en á sama tíma árið áður. Sjávarafurðir voru 39,9% alls útflutnings og var verðmæti þeirra 8,7% meira en á sama tíma árið áður. Útfluttar iðnaðarvörur voru 55,4% alls útflutnings og var verðmæti þeirra 34,3% meira en á sama tíma árið áður. Mest aukning varð í verðmæti útflutnings iðnaðarvara, aðallega áls. Einnig varð aukning í útflutningi sjávarafurða en samdráttur varð í útflutningi á skipum og flugvélum.

Fyrstu ellefu mánuði ársins 2010 var verðmæti vöruinnflutnings 33,8 milljörðum eða 9,2% meira á föstu gengi en á sama tíma árið áður. Aukning varð í innflutningi á hrá- og rekstrarvöru, fjárfestingarvöru og eldsneyti en á móti kom samdráttur í innflutningi á flutningatækjum.