Gagnaverin farin að láta vita af sér á ný

Áhugi þeirra sem vildu reisa hér gagnaver hefur lifnað við á ný eftir doða í kreppunni. Undanþágur frá virðisaukaskatti og samræming skattareglna um starfsemi gagnavera innan aðildarríkja Evrópusambandsins hafa orðið til að glæða lífi í hann.

„Þetta frumvarp um breytingu á virðisaukaskattslögum sem samþykkt var fyrir jól réði úrslitum um það hvort þessi iðnaður fer af stað hér eða ekki," segir Guðmundur Gunnarsson, framkvæmdastjóri Farice, sem rekur sæstrenginga tvo, Farice og Danice. „Ef það hefði ekki gerst hefðu þeir aðilar bara pakkað saman sem eitthvað voru að skoða hér."

Guðmundur segir að allir þeir sem viðrað hafi áhuga á því að reisa hér gagnaver hafi beðið svo mánuðum skipti eftir niðurstöðum frumvarps um starfsumhverfi þeirra hér í fyrra. Þegar það náði í gegn hafi komið kippur í málið.

Töluverður áhugi var hér fyrir um þremur til fjórum árum á byggingu gagnavera og talið að það myndi valda sprengingu í eftirspurn eftir fólki með hátæknimenntun. Fyrstu niðurstöður athugunar á samkeppnishæfni Íslands fyrir netþjónaúbú voru kynntar um mitt ár 2007 og voru þær einkar jákvæðar. Í kjölfarið lýstu erlendir hátæknir­isar á borð við Yahoo, Microsoft og Google yfir áhuga á að reisa hér gagnaver og var stefnt á að þau myndu rísa á næstu tveimur til þremur árum. Síðan þetta var hefur lítið þokast. Eina gagnaverið sem risið hefur til þessa er á vegum Thor Data Center í Hafnarfirði auk þess sem vinna stendur yfir við byggingu vers Verne Holding á gamla varnarliðssvæðinu á Reykjanesi.

Jón Viggó Gunnarsson, framkvæmdastjóri Thor Data Center, tók í samtali við Fréttablaðið á dögunum í svipaðan streng og framkvæmdastjóri Farice; áhugi á vistun gagna hér hafi aukist mikið eftir að frumvarpið hafi komist í gegn. Tækifæri séu fyrir hendi fyrir gagnaver hér enda farið að þrengja um þau í öðrum löndum.

Helsti þröskuldurinn á sínum tíma sem talinn var geta staðið í vegi fyrir uppbyggingu gagnavera var ótryggt netsamband Íslands við umheiminn. Guðmundur hjá Farice segir öryggið hafa batnað stórum frá því þetta var. Sæstrengirnir eru nú orðnir tveir auk þess sem fyrirtækið hafi síðastliðin tvö ár einnig haft aðgang að Greenland Connect, sæstreng Tele Greenland sem liggur á milli Íslands, Grænlands og Kanada og kemur á land í Landeyjum eins og Danice-strengurinn. Detti niður tenging á einum streng taki annar við. „Ísland er nú mjög vel tengt við umheiminn og getur þjónað ýmiss konar starfsemi," segir hann.