Samtök atvinnulífsins vilja fara „Atvinnuleiðina“

Stjórn Samtaka atvinnulífsins hvetur eindregið til samstöðu milli aðila vinnumarkaðarins, ríkisstjórnarinnar og Alþingis um að marka svokallaða „Atvinnuleið" út úr því „kreppuástandi sem nú ríkir í atvinnulífinu og samfélaginu öllu og birtist í slæmri stöðu fjölda fyrirtækja og atvinnuleysi 14000 manns."

Í ályktun stjórnar SA segir að hugmyndin byggi á kjarasamningum til þriggja ára með samræmdri launastefnu og launahækkunum í takt við nágrannalöndin. Þá verði ennfremur byggt á því að fjárfestingar í öllum greinum atvinnulífsins aukist og að vöxtur í fjárfestingum og útflutningi varði leiðina út úr kreppunni.

Samtök atvinnulífsins kalla eftir samstarfi ríkisstjórnar og Alþingis við aðila vinnumarkaðarins um að draga úr óvissu og skapa skilyrði fyrir stórauknum fjárfestingum í atvinnulífinu, segir ennfremur.

Nánar er fjallað um „Atvinnuleiðina"á heimasíðu SA.