Lán ÍLS í desember námu 2 milljörðum

Heildarútlán Íbúðalánasjóðs (ÍLS) námu um 2 milljörðum króna í desember, en þar af voru rúmir 1,7 milljarðar króna vegna almennra lána.

Þetta kemur fram í mánaðarskýrslu sjóðsins fyrir desember. Í henni kemur fram að heildarútlán sjóðsins á fjórða ársfjórðungi ársins 2010 námu tæpum 6,4 milljörðum króna samanborið við rúma 6,2 milljarða á sama tímabili 2009.

Samtals námu útlán sjóðsins á árinu 2010 um 26,9 milljörðum króna samanborið við tæpan 31 milljarð króna á árinu 2009. Meðalútlán almennra lána voru um 10,3 milljónir króna í desember en um 8,3 milljónir í nóvember síðastliðnum.

Heildarvelta íbúðabréfa nam um 48 milljörðum króna í desember samanborið við 119,5 milljarða í nóvember. Ársvelta íbúðabréfa á árinu 2010 nam tæpum 876 milljörðum króna samanborið við um 985 milljarða veltu á árinu 2009.

Greiðslur Íbúðalánasjóðs námu rúmum 11 milljörðum króna í desember, en þær voru að mestu vegna afborgana íbúðabréfa. Uppgreiðslur lána Íbúðalánasjóðs í desember námu um 1,9 milljörðum króna.