Væntingar um verðbólgu ekki minni síðan 2007

Í desember síðastliðnum vænti almenningur þess að verðbólgan verði 4% eftir 12 mánuði samkvæmt könnun sem Capacent Gallup gerir fyrir Seðlabanka Íslands og niðurstöður voru birtar um í hagvísum bankans fyrir sama mánuð. Samkvæmt þessari könnun hafa væntingar almennings um verðbólgu ekki verið minni síðan í ágúst árið 2007.

Fjallað er um málið í Morgunkorni greiningar Íslandsbanka. Þar segir að þegar þessi könnun var framkvæmd í desember árið 2009 bjóst almenningur við því að árstaktur verðbólgu í lok ársins 2010 yrði 10%, og er ljóst að verulega hefur dregið úr væntingum almennings um verðbólgu síðasta árið.

Þetta er í takti við þróunina á vísitölu neysluverðs á sama tíma, en sem kunnugt er hefur verðbólgan hjaðnað verulega á síðustu misserum og mældist verðbólgan síðast, þ.e. í desember síðastliðnum, 2,5% sem jafnframt er verðbólgumarkmið Seðlabankans.

Engu að síður er ljóst að almenningur væntir þess að verðbólgan verði meiri eftir ár en hún hefur verið undanfarið, en verðbólgan hefur verið undir 4% frá því í september síðastliðnum. Jafnframt eru þessar væntingar almennings um verðbólgu nokkuð umfram það sem flestar opinberar spár hafa reiknað með að hún verði. Þetta kemur ekki á óvart enda virðast verðbólguvæntingar almennings almennt ekki mótast af verðbólguspám heldur frekar af þeirri verðbólgu sem verið hefur undangengna mánuði.

Þó ætti þetta að létta Peningastefnunefnd Seðlabankans framkvæmd verðbólgumarkmiðs bankans, enda hafa væntingar um minni verðbólgu m.a. þau áhrif að það dregur úr launakröfum launþega sem augljóslega ætti að öðru óbreyttu að leiða til minni verðbólguþrýstings þegar fram í sækir. Auk þess hækka seljendur innlendrar vöru og þjónustu síður verð ef þeir búast við hóflegri almennri hækkun verðlags.