Hafa miklar áhyggjur af Magma-málinu

Fjárfestar í Bandaríkjunum og bandarískir sérfræðingar á sviði jarðvarmaorku hafa áhyggjur af pólitískum óstöðugleika á Íslandi og hugsanlegu eignarnámi HS Orku.

Spurningar þess efnis komu á blaðamannafundi á Jarðhitaþinginu á Ritz-Carlton hótelinu í New York í morgun og einnig í pallborðsumræðum um nýtingu jarðhitaauðlinda í ráðstefnusalnum sjálfum. Þá hafa fundarmenn sem fréttastofa hefur rætt við lýst yfir áhyggjum sínum og verið að spyrja um málið. Á blaðamannafundinum í morgun vildu blaðamenn heyra skoðanir Ólafs Ragnars, forseta, á Magma-málinu, en hann vildi efnislega mjög lítið tjá sig um málið og vísaði á fulltrúa Magma.

Jarðhitaþingið í New York á Ritz-Carlton hótelinu er á vegum Geothermal Energy Association í Bandaríkjunum, en fulltrúar fréttastofu Stöðvar 2 og Vísis eru á staðnum. Ásgeir Margeirsson, forstjóri Magma Energy á Íslandi, sem er meðal fundargesta, sagði í pallborðsumræðum að boranir eftir jarðvarma gætu farið fram á sjálfbæran hátt og markmiðið væri að ganga skynsamlega um jarðhitaauðlindir með það fyrir augum að nýting þeirra væri sjálfbær til lengri tíma.

Hafa áhyggjur af þjóðnýtingu

Fjárfestir úr salnum hafði miklar áhyggjur af HS Orku og spurði hvort þjóðnýting væri hugsanleg í ljósi þeirra yfirlýsinga sem birst hefðu frá fulltrúum ríkisstjórnar í fjölmiðlum og ýmissa frétta um málið frá Íslandi. Ásgeir Margeirsson sagði að það hefði margoft komið fram að fjárfesting Magma Energy í HS Orku væri í fullu samræmi við lög og reglur á Íslandi.

„Hvað varðar vinstristjórnina á Íslandi, sumum á Íslandi er illa við erlenda fjárfestingu. Svo við höfum lent í slag heima út af því. Að hluta til snýst þetta ekki um erlenda fjárfestingu heldur hindrun atvinnuuppbyggingar á sviði stóriðju," sagði Ásgeir. Þetta tvennt hefði blandast saman í umræðunni. Hann sagði að verið væri að ná sátt um þetta mál, þ.e eignarhaldið á HS Orku, á Íslandi með styttingu á nýtingartíma auðlindarinnar. Því væri þjóðnýtingin (eignarnámið) á HS Orku úr sögunni. „Við þurfum því ekki að hafa áhyggjur af þessu, en takk fyrir spurninguna," sagði Ásgeir. thorbjorn@stod2.is