Allir hinir föllnu í skoðun að ári liðnu

Ekki er útilokað að eftir ár muni mál tengd öllum þeim fjármálafyrirtækjum sem farið hafa í þrot eða í gegnum fjárhagslega endurskipulagningu verða í skoðun hjá embætti sérstaks saksóknara. Þetta segir Gunnar Andersen, forstjóri Fjármálaeftirlitsins, FME.

Þetta á við um VBS fjárfestingarbanka, Byr sparisjóð, Sparisjóðinn í Keflavík, SPRON, Sparisjóðabanka Íslands, áður Icebank, Askar Capital og fjármögnunarfyrirtækið Avant. FME mun á næstunni senda eitt til þrjú mál til sérstaks saksóknara.

Málin eru af svipuðum toga og þau sem FME hefur þegar sent sérstökum saksóknara. Þau varða grun um grófa markaðsmisnotkun, innherjaviðskipti, ranga skýrslugjöf og óheilbrigða vafasama viðskiptahætti.

Strax eftir fall stóru viðskiptabankanna þriggja fékk FME óháða sérfræðinga til að gera athugun á starfsemi þeirra og vinna skýrslu um málið. Slíkt hið sama var gert í tilviki þeirra fyrirtækja sem fóru í slitameðferð eða í gegnum endurskipulagningu í kjölfarið.

Gunnar segir að á grunni skýrslnanna séu einstök mál rannsökuð og þau send áfram til sérstaks saksóknara ef tilefni þykir til. Hjá FME starfa tvö rannsóknarteymi með þrettán manns og hafa þeir aldrei verið fleiri. Gunnar segir líklegt að þeim verði fjölgað um fjóra á næstunni.

FME hefur fram til þessa sent frá sér 54 mál til sérstaks saksóknara sem teymin hafa unnið og átti eftirlitið 60 prósent mála sem lágu hjá embættinu um mitt síðasta ár. Gunnar segir rannsókn FME hvergi nærri lokið.

„Það eru mörg mál í vinnslu, að vísu er ekki búið að skoða þau öll. Þetta er langt í frá að verða búið," segir Gunnar. Samkvæmt stefnuskjali FME mun rannsóknum á falli bankanna ljúka á næsta ári.

- jab