Slitastjórn Landsbankans óskar skýringa hjá bankaráði

Slitastjórn og skilanefnd Landsbankans hefur sent öllum bankaráðsmönnum bankans og tveimur bankastjórum fyrir hrun, að Björgólfi Guðmundssyni undanteknum, bréf þar sem óskað er skýringa þeirra á ýmsum atriðum og meintu misferli í þeirra í starfi sem upp hafa komið við rannsóknir á málefnum bankans.

Páll Benediktsson talsmaður skilanefndar staðfestir í samtali við visir.is að bréf hafi verið sent meðlimum bankaráðsins og bankastjórunum Halldóri J. Kristjánssyni og Sigurjóni Þ. Árnasyni en þeir sátu flesta flundi bankaráðsins. Í bankaráðinu sátu Björgólfur Guðmundsson, Andri Sveinsson, Kjartan Gunnarsson, Svafa Grönfeldt og Þorgeir Baldursson.

Björgólfur Guðmundsson formaður bankaráðsins fékk ekki bréf frá slitastjórninni þar sem hann hefur ekki lengur umráð yfir eigin fjármálum, þ.e. hann er í gjaldþrotameðferð. Slitastjórn hefur aftur á mót lýst kröfum í þrotabú hans.

Páll segir að í bréfinu sé óskað viðbragða og andmæla af hálfu viðtakenda um ýmis atriði sem rannsóknir hafa leitt í ljós. Hann vill ekki tjá sig nánar um málið né ræða upphæðir. „Framhald þessa máls verður svo ákveðið eftir að okkur hafa borist svör við bréfinu," segir Páll.

Þess má geta að í desember s.l. krafði slitastjórn Landsbankans þá Sigurjón Þ. Árnason og Halldór J. Kristjánsson hvorn um sig um 37 milljarða króna vegna meintrar vanrækslu í tveimur viðskiptasamningum sem báðir tengjast félögum í eigu Björgólfsfeðga. Annað málið snertir tryggingar vegna vanhalda á innheimtu ábyrgðar vegna láns til Grettis en hitt snertir lán til Straums.

Þá sagði lögmaður Sigurjóns að það væri óeðlilegt að bankastjórar Landsbankans væru krafðir um 37 milljarða króna af slitastjórn bankns vegna verka annarra meðan engar kröfur eru gerðar á hendur bankaráðsmanna.