Aukin loðna er yfir 5 milljarða búbót fyrir Ísland

Aukinn loðnukvóti upp á 125.000 tonn gefur þjóðarbúinu yfir 5 milljarða kr. í auknar útflutningstekjur. Sigurgeir Brynjar Kristgeirsson framkvæmdastjóri Vinnslustöðvarinnar í Vestmannaeyjum segir að kvótaaukningin sé mikil búbót fyrir útgerðina.

„Það er alveg kærkomið að fá þessa aukningu í loðnuveiðarnar núna," segir Sigurgeir en nefna má að loðnuvertíðin undanfarin tvö ár hefur verið mjög döpur.

Afurðaverð fyrir loðnuafurðir hefur hækkað töluvert undanfarin tvö ár. Samkvæmt listum um hrávöruverð á mörkuðum í heiminum sem birtur er á vefsíðu Alþjóðagjaldeyrissjóðsins hefur verð á fiskimjöli hækkað um yfir 60% á síðustu tveimur árum. Meðalverðið var 1.160 dollarar á tonnið árið 2008 en var komið í 1.739 dollara á tonnið í fyrra.

Sigurgeir segir að einnig megi nefna að verð á loðnulýsi hafi rokið upp á síðustu mánuðum. „Það er því orðið spurningum um hvort sé hagkvæmara að frysta loðnuna eða setja hana í bræðslu," segir Sigurgeir.

Ástæðan fyrir miklum verðhækkunum á fiskimjöli og lýsi er fyrst og fremst hinn mikli uppskerubrestur á korni víða um heiminn á síðasta ári.

Í framangreindum útreikningum er miðað við útflutningsverð upp á um 45 kr. fyrir kílóið af loðnu og tekið er tillit til þess afla sem Norðmenn og aðrar þjóðir mega veiða.