Líklegt að Seðlabankinn sporni við styrkingu krónunnar

„Sé horft til nokkurra ára er líklegt að Seðlabankinn muni sporna við verulegri styrkingu á gengi krónunnar með því að kaupa erlendan gjaldeyri fyrir krónur."

Þetta kemur fram í Markaðfréttum Íslenskra verðbréfa. Seðlabankinn birti tölur um raungengi í lok síðustu viku og lækkaði það um 2,8% í janúar miðað við verðlag. Það lækkaði einnig í desember eftir að hafa hækkað nær óslitið eitt og hálft ár þar á undan.

Ástæða lækkunarinnar er veiking krónunnar og verðhjöðnun undanfarna tvo mánuði, en raungengið er reiknað út frá hlutfallslegu verðlagi milli Íslands og helstu viðskiptalanda og gengisþróunar. Raungengi krónunnar er því mælikvarði á samkeppnisstöðu innlendra atvinnuvega út á við.

Raungengið er um 19% undir meðaltali síðustu 10 ára og svipað sé miðað við undanfarin 30 ár.