Söluferlið á Högum á lokasprettinum

Viðræður Arion banka við fjárfesta um kaup á kjölfestuhlut í verslanakeðjunni Högum eru nú á lokastigi og býst bankinn við að ganga frá sölu á hlutnum á næstu vikum.

Arion banki hóf söluferlið á Högum hinn 18. október síðastliðinn, en í fyrasta hluta þess var boðinn til sölu 15-29 prósenta kjölfestuhlutur í fyrirtækinu.

Eins og fréttastofa greindi frá í nóvember skiluðu tíu fjárfestar inn óskuldbindandi tilboðum meðal þeirra voru Kea, Auður Capital, sjóður á vegum Stefnis, eignastýringarfélags Arion banka, félag sem tengist bandaríska fyrirtækinu Yucaipa sem á 32 prósenta hlut í Eimskip, Framtakssjóður Íslands og Saga Fjárfestingarbanki fyrir hönd ótilgreindra fjárfesta.

Bandaríkjamennirnir áfram

Samkvæmt heimildum Stöðvar 2 komust fjórir hópar áfram í söluferlinu, en aðeins þrjú nöfn hafa fengist staðfest. Það er Framtakssjóður Íslands, bandaríska félagið Yucaipa og sjóður á vegum Stefnis, eignastýringarfélags Arion banka. Eftir því sem fréttastofa kemst næst er þó Framtakssjóðurinn, sem bauð í 25 prósenta hlut, ekki framarlega í viðræðunum núna.

Að sögn fulltrúa eins af tilboðsgjöfunum verður kaupverðið aldrei undir mörkum sem gera ráð fyrir að 100 prósent hlutafjár í Högum sé átta milljarða króna virði, eða tuttugu milljarðar króna í heildina með yfirtöku skulda.

Á félaginu hvíla rúmlega tólf milljarða króna skuldir, en langstærstur hluti upphæðarinnar er hjá Arion banka. Bankinn er þó að búast við mun hærra kaupverði en tuttugu milljörðum króna ásamt yfirtöku skulda og eru því átta milljarðar króna, án skuldanna, töluvert undir því verðbili sem bankinn getur sætt sig við, samkvæmt upplýsingum Stöðvar 2. EBITDA Haga-samstæðunnar, þ.e hagnaður fyrir skatta, afskriftir og fjármagnsliði, var um fjórir milljarðar króna á síðasta ári, samkvæmt upplýsingum Stöðvar 2.

25,7 milljarða króna virði miðað við algenga stuðla

Allur gangur á því hvaða stuðull er notaður til að margfalda þá fjárhæð en ef stuðst er við nýjasta uppfærða stuðul fræðimannsins Aswath Damodaran, sem er prófessor í fjármálum við Stern School of Business við New York-háskóla, á verðmæti evrópskra verslanakeðja á sviði matvöru ætti heildarverðmæti 100 prósent hlutafjár í Högum að vera í kringum 25,7 milljarðar króna (6,37*4=25,7), en samkvæmt samantekt hans er 6,37 algengasti margföldunarstuðullinn sem notaður er til að finna verðmæti evrópskra fyrirtækja á sviði matvöru um þessar mundir.

Búist er við að Arion banki tilkynni um söluna á Högum á allra næstu vikum. Þó er ekki útilokað að bankinn fresti viðræðum ef þær reynast ekki árangursríkar og selji ekki kjölfestuhlut að þessu sinni, en það er þó talið ólíklegt. Í sölulýsingu Arion banka frá því í október kemur fram að áformað sé að taka hlutabréf í Högum til viðskipta í Kauphöll Íslands (Nasdaq OMX Iceland), en að almenningi standi til boða að kaupa hlutabréf í fyrirtækinu áður í útboði. Samkvæmt upplýsingum frá Arion banka standa þessi áform óhögguð og er stefnt að skráningu félagsins í Kauphöll með haustinu fari svo að kjölfestuhlutur verði seldur núna. thorbjorn@stod2.is