Áhættuálagið hækkar mest á Ísland af Evrópuþjóðum

Skuldatryggingaálagið á Ísland hefur hækkað mest meðal Evrópuþjóða að undanförnu hvort sem miðað er við í punktum talið eða hlutfallslega.

Þetta kemur fram í Morgunkorni greiningar Íslandsbanka. Eins og greint var frá á visir.is í morgun hefur skuldatryggingaálag á evruskuldir Ríkissjóðs Íslands hækkað nokkuð á undanförnum dögum. Í lok dags í gær stóð álagið til fimm ára í 308 punktum (3,08%) samkvæmt gögnum úr Bloomberg-gagnaveitunni en viku áður var álagið komið niður í 257 punkta sem er með því lægsta sem það hefur farið niður í frá bankahruninu um haustið 2008.

Í Morgunkorninu segir að sömu sögu er að segja um skuldatryggingaálag ríkissjóðs til eins árs, sem stóð í gær í 366 punktum en var viku áður 307 punktar.

Þessi hækkun á skuldatryggingaálagi Íslands er ekkert einsdæmi á meðal ríkja í Vestur Evrópu. Þannig hefur álagið hækkað á öll ríki þessa heimshluta á tímabilinu að Hollandi undanskildu. Í gær stóð meðaláhættuálagið til fimm ára á ríki Vestur Evrópu í 234 punktum sem er tæpum 13 punktum hærra en það stóð í fyrir viku síðan. Þó lækkaði það nokkuð frá deginum áður en þá stóð meðalálagið í 240 punktum sem er það hæsta sem það hefur farið upp í.

„Engu að síður hefur álagið á Ísland hækkað mest í þetta sinn, hvort sem miðað er við í punktum talið eða hlutfallslega," segir í Morgunkorninu.

„Við teljum þó líklegt að þessi hækkun tengist ekki sérstökum innlendum þáttum, þar sem benda má á fleiri þætti sem þarna geta haft áhrif sem teljast til jákvæðra tíðinda fremur en neikvæðra. Nærtækast er að nefna að fjórða endurskoðun efnahagsáætlunar íslenskra stjórnvalda og Alþjóðagjaldeyrissjóðsins er í höfn, auk þess sem ekki er ólíklegt að samkomulag náist loksins um Icesave nú í mánuðinum.

Teljum við því litla undirstöðu fyrir þessari hækkun álagsins að þessu sinni og að hún sé því aðeins tilfallandi og komi til með tíð og tíma að ganga til baka."