Ofurútgáfa af Range Rover kostar 50 milljónir

Range Rover verksmiðjurnar munu í næsta mánuði kynna nýja útgáfu jeppans sem ber heitið Range Rover Autobiography Ultimate Edition. Þessi ofurútgáfa af jeppanum verður aðeins smíðuð í 500 klæðskerasaumuðum eintökum og reikna má með að kominn götuna á Íslandi kosti gripurinn yfir 50 milljónir kr.

Í umfjöllun um málið á vefsíðunni e24.no segir að hægt sé að velja á milli V8 4,4 lítra díselvélar eða V8 Supercharged bensínvélar sem kemur jeppanum frá núlli í 100 km hraða á 5,9 sekúndum.

Staðalbúnaður telur m.a. handsaumuð leðursæti, kæli fyrir drykki, tvær iPad tölvur og viðarflísar á gólfum. Við þetta geta svo kaupendur bætt aukaútbúnaði að eigin vali.

Á Bretlandseyjum í dag kostar dýrasti Range Roverinn 85.000 pund. Þessi ofurútgáfa mun kosta frá 130.000 pundum. Óhætt er að ríflega tvöfalda það verð ef Íslendingur vill fá eitt eintak hingað til lands.