Móðurfélag Olís í gjörgæslu Landsbankans

Athugið að í sjónvarpsútgáfu fréttarinnar er villa um eignarhaldið á Skeljungi sem er að fullu í eigu Skel Investments ehf. en meðal hluthafa þess er Svanhildur Nanna Vigfúsdóttir. Íslandsbanki var þangað til á síðasta ári eigandi 49 prósent hlutafjár í fyrirtækinu. Fréttastofa biðst velvirðingar á mistökunum.



Landsbankinn mun hugsanlega taka Olís yfir vegna erfiðrar skuldastöðu núverandi eigenda félagsins. Bankinn fer sér þó hægt og segist vera að vinna með eigendunum en Olís hefur ekki birt ársreikninga frá árinu 2007.

Íslandsbanki varð stærsti hluthafinn í N1 eftir nauðasamninga og fékk hlutabréfin afhent í gær. Þá eru fleiri olíufélög sem gætu lent í höndum bankanna.

Samkvæmt upplýsingum fréttastofunnar hafa starfsmenn Landsbankans átt í samningaviðræðum við núverandi eigendur Olíuverzlunar Íslands hf. (Olís) til að leysa erfiðan skuldavanda félagsins og er ekki útilokað að skuldum verði breytt í hlutafé og bankinn taki félagið yfir. Bankinn verst þó allra frétta af málinu, enda viðkvæmt.

Samkvæmt heimildum fréttastofunnar verður skuldum breytt í hlutafé ef ekki tekst að leysa vandræði eigendanna. Kristján Kristjánsson, talsmaður Landsbankans, sagði við fréttastofu að bankinn myndi ekki tjá sig um skuldastöðu núverandi eigenda Olís enda væri það stefna bankans að tjá sig ekki um málefni einstakra viðskiptavina.

Sérstaka athygli vekur að Olíuverzlun Íslands hf. hefur ekki skilað ársreikningi frá árinu 2007. Sömu sögu er að segja af móðurfélaginu, FAD 1830 ehf. sem er eigandi 100 prósent hlutafjár í Olís. Því eru í raun takmarkaðar upplýsingar til opinberlega um árangur og stöðu Olís. FAD 1830 er með sama lögheimili og Gísli Baldur Garðarsson, stjórnarformaður Olís.

Fréttastofan bar efni fréttarinnar undir Gísla Baldur. Hann hafnaði viðtali en neitaði því ekki að hugsanlega yrði skuldum breytt í hlutafé. Aðspurður hvers vegna félagið hefði ekki skilað ársreikningum í rúmlega þrjú ár, sagði hann að félagið hefði nýlega skilað ársreikningi frá árinu 2008. Hins vegar er ekki hægt að nálgast þennan ársreikning ennþá hjá ársreikningaskrá.