Ragnar og Sölvi Geir í sigurliði FCK gegn Bröndby

FC Kaupmannahöfn vann dramatískan 2-1 útisigur á Bröndby í dönsku knattspyrnunni í dag. Meistaraliðið átti undir högg að sækja lengst af leik, kom tilbaka og tryggði sér sigur í blálokin.

Ragnar Sigurðsson og Sölvi Geir ottesen Jónsson stóðu vaktina í miðverðinum gegn erkifjendunum í Bröndby. Heimamenn komust yfir í fyrri hálfleik og höfðu góð tök á leiknum.

Í stað þess að nýta sér yfirburðina jafnaði Dame N'Doye metin eftir stundarfjórðungsleik í síðari hálfleik. Bæði lið virtust sátt við skiptan hlut þegar Cesar Santin skoraði sigurmark gestanna á lokamínútunni.

FCK er enn ósigrað á leiktíðinni. Félagið situr í toppsætinu með 28 stig og hefur tólf stiga forskot á Nordsjælland sem á leik til góða.

Átök brustu út milli stuðningsmanna Bröndby og FCK fyrir leikinn í dag. Nokkrir voru handteknir auk þess sem lögreglumaður slasaðist.