Svalbarðsá komin í 37 laxa

Á hádegi í dag laugardaginn 9. júlí, höfðu veiðst 37 laxar í Svalbarðsá, en veiði hófst þar 1 júli. Á mynd er Agnes  Viggósdóttir með glæsilegan 12 punda hæng úr einum besta stað í ánni, Forseta. Laxinn tók rauðan Francis með gullkrók #12.

Nú bíða menn eftir fleiri fréttum af norðurlandi en lítið hefur frést annað en frábær veiði undanfarið í Selá.  Minna fréttist af Hofsá.  En það er vel þekkt að Hafralónsá, Sandá, Svalbarðsá, Jökla, svo að aðeins nokkrar ár frá þessum landshluta séu nefndar, eru yfirleitt seinni til en árnar fyrir sunnan.  Og nú þegar talað er um að allt sé 1-2 vikum seinna á ferðinni er spurning hvenær fyrstu stóru göngurnar mæta í árnar fyrir norðan.